COVID-19: Mizoram dinhmun Hripui vei 531 hmuh belh a ni

November 10, Nilaini khan Mizoramah Covid-19 vei mi 531 hmuh chhuah a ni a, India rama state zingah hripui vei hmuh thar tamna ber pangana a ni. Nimin khan hripui vei dam tawh mi 422 chhuahtir an ni a, nimin tlai dar 5 thlengin Covid-19 vanga thi an awm lo.

Covid-19 vei hmuh tharte chu mipa 224 leh hmeichhia 307 an ni a; ZMC laboratory-a hmuh chhuah 69, TrueNAT hmanga hmuh 42, RAT hmanga hmuh 415 leh Fluorescent Immunoassay (FIA) hmanga hmuh panga an ni.

IDSP record angin, Mizoramah Covid-19 vei 1,26,917 hmuh chhuah a ni tawh a, mipa 61,473 leh hmeichhia 65,444 an ni a, mipa aiin hmeichhia 3,971-in an tam zawk. Nimin tlai dar 5 thleng khan mi 1,20,944 (95.29%) chhuahtir an ni tawh a, mi 456 (0.36%) thi tawhin, enkawl mek mi 5,517 (4.35%) an awm.

November 10, Nilainia Covid-19 vei hmuh chhuah mi 531 zinga mi 336 chu symtom nei an ni a, symptom nei lo mi 193 an awm a; mi pathum erawh chu tarlan chian a ni lo. Nilainia swab sample endikah district pasarih chu Covid-19 positivity rate 10% chung lam a ni a; positivity rate san berna Mamit district-ah 24.19% a tling. Positivity rate 10% chung lam awmna district dangte chu Hnahthial 24.14%, Lawngtlai 18.87%, Champhai 18.69%, Lunglei 16.01%, Serchhip 14.41% leh Saitual 11.41%-te a ni.

Mizorama swab sample endik bikah RT-PCR hmanga endik zat percentage chu ni tin a tlahniam hret hret zel a, Rapid Antigen Test (RAT) hmanga endik zat a pung hret hret thung. November 10, 2021 thlenga swab sample endik tawh 13,61,306 aṭanga RT-PCR hmanga endik zat percentage chu 23.35 a ni a, RAT hmanga endik zat chu 70.65% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,26,386 chu mi 1,000 zelah hripui vei mi 115 an awm ang a ni a; mi 1,00,000 zela Covid-19 vangin mi 41 an thi tawh ang a ni. Nimin khan tlai dar 5 thlengin hripui vei dam tawh mi 422 chhuahtir an ni a; Aizawl district-ah mi 251, Lunglei district-ah 77, Hnahthial district-ah 35, Champhai district-ah 17, Mamit district-ah 16 leh Kolasib district-ah 11 an chhuak.