Hâlpuah, hâlmawi, silai lem khapna thupek khauh takin kan kalpui a ni - Aizawl SP

Aizawl SP C Lalruaia chuan, sorkarin a khap thil - hâlpuah, hâlmawi, silai lem a mu kap chhuak thei leh meithallawn (sky lantern)-te hunpuiah zawrh a nih lohna turin khauh takin khapna thupek an kalpui nghal thu a sawi.

C Lalruaia hian nimin khan a pisaah thuthar thehdarhtute a kàwm a, "Mizoram sorkar chuan hâlpuah, hâlmawi, chinese lantern leh silai lem a mu kap chhuak theite hi mi dang tan leh a hmangtu tan thil ṭha lo leh chhiatna thlen thei, ṭangkaina awm lo a nih avangin zawrh leh hman ṭha a ti lo. Aizawlah chuan DC-in October 13, 2021 khan khapna thupek a tichhuak a ni," a ti.

Kum dangah khap a ni chungin mipuiin an zawm ṭhat loh thu sawiin Aizawl SP chuan, "Mi eng emaw zatin thubuai an neih phah a, a pawi hle. Krismas leh kum thar vuakvet liam taah khan halpuah leh halmawi kaihhnawihah hian Aizawl district-ah case 22 register a ni a, mi 28 thubuai siamsak a ni," a ti a; case pasarihah hremna tihchhuah tawh a nih thu leh a dangte chu court-in a ngaihtuah mek thu a sawi.

Aizawl SP chuan, kuminah khauh takin khapna thupek an kalpui nghal thu sawiin, "October 13, 2021-a khapna thupek chhuah bawhzui hian Aizawl district-ah Special Cell-te'n hma an la nghal a, dawr leh sumdawngte kudam an enfiah reng a ni. Khap thil zuar leh mante chu thubuai siamsak nghal zel a ni ang," a ti.

C Lalruaia chuan, Central YMA-in khauh taka hmalak an tum thu leh local council pawhin an zâwn ṭheuhah hma an lak dawn thu sawiin, "Sumdawng leh bungraw chah luttu agent-te pawh heng khap thil hi chah lut lo turin kan ngen a ni," a ti a; Flipkart leh Amazon hmunpui lam pawh email hmangin khap thilte chu Mizoramah thawn lo tura ngen an nih thu a sawi.

Assam Rifle, CRPF, BSF, BRTF, Field Ambu­lance leh hnam dang (civilian)-te pawhin khapna thupek an ngai pawimawh a, an hmun ṭheuhah an kengkawh nia sawiin Aizawl SP chuan, "Diwali-ah pawh hâlpuah leh hâlmawi hriat tur leh hmuh tur a awm lo. Hmun ṭhenkhata hâlpuah puak zauh awm pawh kan bawhzui nghal a, an hotute pawhin an ûm zui ve nghal a ni," a ti.