Broadband Seismic Station hawn a ni

Lirnghing chungchang zir chianna khawl, Broad­band Seismic Station chu nimin khan Pachhunga University College (PUC)-ah chief minister Zoram­thanga'n a hawng.

Broadband Seismic Station hi Mizoram sorkar leh CSIR-NEIST, Jorhat, Assam hmalaknain Aizawl, Khawbung leh Lungleiahte bun tura ruahman a ni a, Aizawlah chuan PUC-ah dah a ni.

Chief Minister chuan, Broadband Seismic Station chu ṭangkai tak a nih a beisei thu sawiin, "Lirnghingin tun hnaia Mizoram chhim lam a nghawng dan leh zirmite'n lirnghing na tak thlen theihna hmun a awm kan ni tih an sawi," a ti a; lirnghing­in a nghawng theih dan turte zir chiang a, chhiatna hrang hrang thleng thei hmachhawn tura inbuatsaih theih dan turte hriat belh a pawimawh thu a sawi.

Disaster Management & Rehabili­tation minister Lalchamliana pawhin thu sawiin, chhiatna thleng thei hrang hrang laka inven dan leh hma­chhawn dan tur chu sorkar ruahmanna leh mipui thawhpuinain hmalak a nih ṭhin thu a sawi a, "Heng zawng zawngah hian data ṭha leh rintlak neih a pawimawh hle a ni," a ti.

Hawnna inkhawma tarlan danin, Mizoram hmun pathuma Broad­band Seismic Station dah hmangin lirnghing data chhinchhiah ṭhin a ni dawn a, data zawng zawng chu PUC Seismology Centre-ah vawn ṭhat a ni ang a, CSIR-NEIST leh PUC-a Geology depart­ment-te'n chiang zawkin an zir dawn a ni. Zir chiannaa hmuh chhuah pawimawhte chu sorkara a kaihhnawih department-te'n hmalak zelna atana an hmang thei tura ngaih a ni bawk.

Broadband Seismic Station hawnnaah hian CSIR-NEIST director Prof. G Narahari Sastry, Mizoram University pro-vice chancellor Prof. JK Patnaik, PUC honorary adviser Dr Tawnenga, DMR director John LT Sanga, PUC leh sorkar hotute an tel a ni.