Lal Thanhawla'n inthlanah a din a ring tawh lo Kan hneh loh chu sum a ni - MPCC President

Mizoram Pradesh Congress Committee (MPCC) president Dr Lal Thanhawla chuan, MLA inthlanah a din a rin tawh loh thu a sawi a; Tuirial Assembly constituency by-election-a an hmachhawna an hneh loh chu sum a nih thu a sawi.

Nimina Congress Bhavan-a political session-ah thu sawiin Lal Thanhawla chuan, "Tuirial bial by-election kan hmachhawna kan hneh loh chu sum a ni. Kan elpuite'n nasa takin sum an vawrh a, kan hneh ngang lo a ni. Kan hotute'n min dintir ve leh a nih pawhin kei chu ka tling tawh lo ang, vote ka lei ve dawn lo. Mahse, ka din tawh pawh ka ring lo," a ti.

Lal Thanhawla chuan, "Sum hmachhuana inthlan hmachhawn a nih a, sum hmang tam apiang chak tur a nih chuan he ramah hian Congress party chu kan tling lo zel mai thei," a ti a; inthlan hmachhawnna atan Indira Gandhi hun aṭangin hmunpui lam puihna sum tam tak an dawng ṭhin a, mah se, vawi thum pawisa an thawn lêt tawh niin a sawi.

Congress party President chuan, by-election chu rorel lai kuta dah a ni ṭhin tih sawiin, "Hetia ruling party-in ngam taka beih an tawh chhan hi ruling party an ṭha viau lo tihna a ni," a ti a; Congress party-in ṭhat loh theih lohna báwm Mizoram mipui tan a húng dawn nia sawiin, "Chutah chuan kan inkhung vek ang a, kan tling leh ang. Chumi hunah chuan Mizoram hi kan danglam ka beisei. Kawng dik loa kala tlin ai chuan kawng dika kal a tlin loh ngam a ṭha zawk a ni," a ti.

MNF party chu Tuirial bialah tiam famkimin an intiam tih sawiin Lal Thanhawla chuan, "An thutiam an tihhlawhtlin ngei ka duh a, Tuirial bial chhung mipui pawh an nghahhlelhpuiawm a, a tak an hmuh theihna turin chak taka an nawr pawh a ṭul dawn a ni," a ti a; Tuirial by-election-a an candidate duhsaktute chungah a lawm thu leh an candidate Chalrosanga'n tlin loh dan a thiam hlea a hriat thu a sawi.

MPCC secretary Chalrosanga Ralte pawhin thu sawiin, "ZPM bial vawn lai, term lehah pawh bial atana neih tuma an chei mekna hmun, ruling party-in tiam chi tinrénga an tiamna hmun a ni a, ruling party-in opposition min bei zawk a, hei hian kan hmasawnzia a tilang. By-election-ah hian kan tla lo a, kan tling zo rih lo a ni, a tla awmchhun chu ZPM an ni," a ti a; Congress party chu Pathianin hun ṭha a pe ang a, Mizoram mipui tana hna thawk turin an dinchhuah leh dawn thu a sawi bawk.