Chhungkaw hawi zawngin SEDP Kan her tawh dawn - Robert Romawia

MNF adviser Robert Romawia Royte, minister of state chuan, kum hnih leh a chanve chhungin hmasawnna hna thawh nan SEDP sum nuai 73,000 an hmang thei nia sawiin, kum tharah chuan chhungkaw hawi zawngin SEDP an her tawh dawn niin a sawi.

Nimina Mizo Hnam Runa inkhawmah Robert Romawia chuan, "MNF sorkarin kum hnih leh a chanve chhungin hma­sawnna ruhrel siam nan SEDP sum nuai 73,000 chuang a hmang thei a nih chuan kum thar aṭanga chhungkaw hawi zawnga SEDP kalpui hi sorkar tan a harsa lo. Infrastructure lian tham chu central project sum aṭanga siamin, SEDP chu chhungkaw hawi zawngin kalpui tum a ni ta, mi harsa leh rahbi tleu tawhte tan malsawmna thar a thleng dawn," a ti.

Robert Romawia Royte chuan, CM Zoram­thanga chu mi danglam leh ropui tak a nia sawiin, "Delhi tlanga minister senior Ram Vilas Pashwan phei chuan a keah vuanin pathian biakin a be lo chauh. Ani ang hruaitu kan nei hi kan vannei a ni," a ti a, tih theih loh tura ngaih pawh a ti thei zel niin a sawi.

Zoramthanga'n CM a nih hmasak laia Peace Bonus hming phuah­chawpa Finance Ministry aṭanga non-plan sum nuai 18,200 chuang a nawr chhuak chu thil mak a nih thu sawiin Robert Romawia chuan, "Party hruaitu pakhatin Peace Bonus sum hi NLCPR sum a ni, tiin Assembly House-ah a sawi a, hei hi thudik lo a ni. Finance Ministry-in a bika state sorkar min pek zawk a ni," a ti.

Chief Secretary ruat chungchangah Robert Romawia chuan, "CM hmasa khan Mizo ṭawng hmang lo CS turin central sorkarah a zuk dil a, Arvind Ray an pe a nih kha. Kan pu chuan Mizo ngei a dil thung. An duh zawng a inang lo hle a ni," a ti a; ram hmasawnna leh hnam tana ṭha tur ngaihtuah kawngah an inthlau hle niin a sawi.

MNF Adviser chuan, Covid-19 vanga Mizoramin sum a hmuh kim loh chu vbc. 2,000 chuang a nih thu sawiin, "Heti chung hian sorkar a la kal zel thei a, sorkar hmasain sum an la hmuh ngai reng reng lohna aṭangin kan hmu a, scheme awm sa ngai rengah pawh sorkar hmasa hmuh lêt sînga tam pawisa hmuhna kan nei. Hengte hi CM leh Dy CM ṭha kan neih vang a ni," a ti.

Robert Romawia Royte chuan, "Party dang chuan kum hnih vel an sorkar hnuah manifesto an sawi ngai lo. Keini chuan kum thum kan sorkar hnuah sawi nuam kan ti a, tihhlawhtlin tam tak kan nei tawh. Kum hnih leh a chanve chhung cheng nuai 73,451.09 séngin kan kalpui tawh," a ti. Chief Minister hoa lung an phûmte chu thawh loh an neih loh thu leh Covid vangin pakhat chiah an la thawh loh thu sawiin, "MNF sorkar chuan 'Kan ti ang' kan tihte chu tih loh kan nei lo," a ti bawk.