KHAWTHLIR
Thisen pe
Nimin khan Mamawii Higher Secondary School NSS-te'n Aizawl Civil Hospital blood bank-ah thisen unit 26 an pe a, petute mipa 16 leh hmeichhia 10 an ni a; Republic Higher Secondary School NSS-te'n unit riat an pe bawk. Serchhip Vengchung Branch YMA pawhin nimin khan Serchhip District Hospital tan thisen unit 25 an pe a, petute mipa 22 leh hmeichhia pathum an ni.
Bawhzui turin ngen
Mizoram CSS Hindi Teacher's Association (MCHTA) chuan thuchhuah siamin, Mizorama CSS Hindi zirtirtu, kum 2017-a bàn tâkte chu October 21, 2021 khan High Court-in thawhtir (re-engage) leh turin thutlukna a siam tih an tarlang. MCHTA chuan, sorkara an thawh leh theihna tura an hmakhua ngaia hma laksaktu zawng zawng chungah an lawm thu an sawi a, "High Court-in re-engage kan nihna tur order a tihchhuah tawh chu a rang thei ang bera min bawhzuisak turin sorkar kan han ngen nghal a ni," an ti.
Thuthlung ziak
Mizoram Youth Commission (MYC) leh Sainik Welfare & Resettlement chuan November 11, Ningani khan Service Selection Board (SSB) 2022 interview hmachhawn tur Mizo ṭhalaite tana coaching buatsaih turin thawhhona thuthlungah an ziak. Thuthlungah hian MYC chairman Dr Vanlalṭanpuia, MLA leh Sainik Aizawl district officer Maj. Rebecca Lalzarzovi Chhakchhuak ten hming an ziak a ni.
Minister-in a hmanpui
Power & Electricity minister R Lalzirliana chuan nimin khan St. Anthony’s Higher Secondary School-in Chanmari YMA Hall-a kumin HSLC leh HSSLC exam-a an zirlai ti ṭhate chawimawina an buatsaih a hmanpui a, zirna in ṭha tak din a nih mek laiin zirlaite'n thiamna tak tak an paw chhuak em tih chu zawhna lian tak a nih thu a sawi. Inkhawmah hian sikul neitute'n an zirlai naupang HSLC leh HSSLC top 10-a lang mi palite tana Rs 1,00,000 an pek chu minister R Lalzirliana'n naupangte hnenah a hlan a ni.
Pneumonia zirho
National Health Mission chuan nimin khan Lunglei Convention Centre Hall-ah 'Social Awareness and Action to Neutralize Pneumonia Successfully Campaign' an buatsaih a, Lunglei senior medical officer Dr Lalrinthangi'n a hawng. Lunglei South bial chhunga community health officer, health supervisor, health worker leh ASHA-te an tel a, campaign neih chhunga hmalak dan tur an zir a ni.
Kawng khar dawn
PWD-in NH-54 (178-179) Bawngkawna Durtlang péng aṭanga Hauva Petrol Pump inkar kawng an siam dawn a, November 14, Pathianni aṭanga hna thawh zawh a nih hma chuan kawngpui chanve khâr a nih dawn thu Aizawl Traffic SP Rodingliana Chawngthu-in a puang. Hna thawhna huam chhung kawngpui sirah lirthei leh bungrua dah phal a ni lo bawk.
CSS hmalakna sawiho
Lawngtlai District Development Coordination and Monitoring Committee (DISHA) chu an chairman C Lalrosanga, Lok Sabha MP kaihhruaiin nimin khan video conferencing kaltlangin an ṭhukhawm a, sorkar laipui scheme hrang hranga hna thawh dan, harsatna awmte leh a chinfel dan turte an sawiho.MP C Lalrosanga chuan, Lawngtlai district chu ramri hnaih district leh autonomous district council pahnih chhungkhungtu a nih avangin district pawimawh a nih thu a sawi a; hmasawnna fawng vuantu department hrang hrang hotute chu ṭhahnemngai taka thawk turin a chah.