Phullen/Thanglailung WSS enchhin

Combined Phullen/Thanglailung Water Supply Scheme (Pumping) chu nimin khan PHE secretary Lalmuanzova hoin hlawhtling taka enchhin (trail run) a ni a; PHE engineer-in-chief C Lalremsiama, chief engineer F Liantluanga leh thawktu dangte leh khawtlang hruaitute an tel.

Phullen/Thanglailung WSS hnuaiah hian Tuivawl lui kuangah tuikhuah (weir) a ni a, chuta ṭang chuan raw water 100mm GI(M) pipe metre 500-a seiin treatment plant (0.128 MLD) kaltlangin, metre 89-a sang clear water tuizemah tui lak chhoh a ni; darkar khatah tui litre 30,000 a pump thei.

Clear water tuizem aṭangin 100mm ERW leh GI(M) pipe metre 8,000-a sei hmangin Phullen khuaa metre 750-a sang tlanga tuizem lianah tui lak leh a ni a, darkar khatah litre 28,500 lak theih a ni.

Phullen leh Thanglailung khaw châwm tura duan a nih angin tuizem lian aṭangin Phullen khaw chhunga distribution line-ah leh Thanglailung khaw zonal tank-ah lei hipna (gravity) hmangin tui pek a ni ang.

Jal Jeevan Mission (2019-20) hnuaia thawh zawh tawh Phullen khuaa in 430 leh Thanglailung khuaa in 176 hnenah tui connection pek a ni a, ni tin in tinah mi pakhat tan tui litre 55 pe thei tura duan a ni.