World Pneumonia Day hman a ni

National Health Mission (NHM) hnuaia Reproductive & Child Health (RCH) chuan nimin khan Taxation department auditorium-ah World Pneumonia Day an hmang a, Health & Family Welfare minister Dr R Lalthangliana'n a hmanpui.

Health Minister hian naupang kum 5 hnuai lam zinga pneumonia vanga thihna titlem tura beihpui thlakna, Social Awareness and Action to Neutralize Pneumonia Successfully (SAANS) a hawng a ni.

Dr R Laltlangliana chuan, pneumonia chu India rama naupang thihna thlentu tam ber a nih thu sawiin, "India sorkar chhinchhiah danin, naupang kum 5 hnuai lam thihna 14% hi pneumonia vang a ni a, Mizoram bikah phei chuan 15% lai a ni," a ti a, natna hriat chhuah hma leh enkawl vatin naupang thihna nasa taka a tihhniam theih thu a sawi.

SAANS-in a tum ber chu pneumonia vanga naupang thi 1,000 zela panga ni mek chu kum 2025-ah chuan 1,000 zela pathuma tihhniam a nih thu sawiin Health Minister chuan, "Thil harsa tak a ni mai thei a, mahse, thil theih a ni. Ṭhahnemngai taka kan ṭan tlan chuan kan hlen thei ngeiin a rinawm," a ti a; Health department hmalakna chauh a tâwk loh avangin ṭhahnemngai taka hma la ṭheuh turin mipui a sáwm.

NHM mission director Dr Eric Zomawia chuan, páwl hrang hrang inzawm khawm, Global Coalition Against Child Pneumonia bultumin kum 2019 aṭangin November 12-ah World Pneumonia Day hman ṭan a nih thu a sawi a, "Mizoram leh state tam zawk chuan Covid-19 vanga an kalpui theih loh hnuah kumin hian a vawi khatna atan kan hmang ve ṭan a, SAANS hi November 12, 2021 aṭanga February 28, 2022 thleng kalpui tur a ni," a ti. Hmalak dan turte sorkar laipuiin a duang vek a, hma latu tur bik Health department hnuaia thawkte pawh zirtir vek tawh an nih thu a sawi bawk.

RCH state programme officer Dr Lily Chhakchhuak tarlan danin, pneumonia hi naupang kum 5 hnuai lama thihna thlen tam bertu a ni a; naupang khuh, khawsik, hnute hne duh lo, hritlang áwm ná leh kaih nei an awm chuan a rang thei ang bera damdawi lam thiamte ráwn tur a ni. Thaw rang an nih chuan pneumonia an nei anga ngaih a nih avangin hlamchhiah loh tur a ni a, an thâwk zawnga an áwm hnuai lamah khuar kâwk kâwk a awm chuan a na viau tawha ngaih a ni.