Ngaihtuahna thara hna thawk tur Mizoramin a mamawh - ZPM GS

ZPM party chuan nimin khan Bawngkawn Bazar Vengah an party zawm tharte lawm luhna inkhawm an buatsaih a, general secretary Phairothanga'n thu sawiin, ngaihtuahna thara hna thawk thei tur rorel khawl Mizoramin a mamawh thu a sawi.

Phairothanga chuan, Mizoramin rorelna rahbi hrang hrang district council, union territory leh state dinhmunte paltlangin kum 70 zet hmasawnna kawng a zawh ve tawh tih sawiin, "Hruaitu fel tak takte zarah tun dinhmun hi kan thleng a, an chungah kan lawm tak meuh. State dangte ûm a, chak zawka hmasawnna kawng zawh ve tawh turin chìn dan hlui paih a, ngaihtuahna thara hna thawk thei tur rorel khawl kan mamawh ta hle," a ti.

ZPM General Secretary chuan, sorkar hnathawkin hlawh an lak mumal theihloh laiin SEDP sum sem tum thu sorkar hotute'n an puang tih sawiin, "Tunah pawh group A leh B chuan hlawh an la la thei lo hial a ni. Hriselna atan sum a awm theih loh laiin phûl lem phah thâwm a awm reng a ni," a ti a; ZPM a sorkar hunah kum nga chhungin kawlphetha (hydel leh solar energy)-ah intodelh tum a nih thu a sawi bawk.