Kuhva chingtute harsatna CM-ah thlen

Mamit District VC Association hruaitute chuan nimin khan chief minister Zoramthanga chu a pisa-ah hmuin, an district chhunga kuhva chingtute harsatna sutkian sak turin an ngen.

Mamit District VC Association chuan an district chhung, a bik takin Hachhek tlangdunga kuhva huan siamtuten an kuhva rah hralhna kawngah harsatna nasa tak an tawk mek tih sawiin, "Assam aṭanga kuhva rah lei tuten kuminah an lei ṭhat loh avangin leh rate hniam zawk a leisak an tum avangin harsatna an tawk nasa hle," an ti.

Assam lamin Burma ram aṭanga kuhva rah phur tela an puh ṭhin avanga chhiah tam tak an fine tir ṭhin avangte, Assam lamin Mizoram aṭanga kuhva phur lut turte hnenah pawisa tam tak an chawi tir avangte leh Assam aṭanga kuhva rah lei turten an lei ṭhat duh loh avang leh tlawm tak tak a lei an tum avangin kuhva huan siamtuten kum dang aia nasa taka a man an hloh thute Mamit District VC-te hian CM hnenah hian an thlen.

Chief Minister chuan Mizoram aṭanga Assam lama kuhva rah hralh chungchanga harsatna a awm chu pawi a tih thu sawiin, chak taka hmalak a tum thu a lo hrilh.