Mizoram aia Covid-19 vei hmuh tamna state pali a awm

November 11, Ningani khan Mizoramah Covid-19 vei mi 631 hmuh chhuah a ni a, India ramah Mizoram aia hmuh thar tamna state pali a awm. Nimin khan hripui vei dam tawh mi 496 chhuahtir an ni a, niminah tlai dar 5 thlengin hripui vangin mi pakhat a thi.

Covid-19 vei hmuh thar 631-te chu mipa 315 leh hmeichhia 316 an ni a; ZMC laboratory-a hmuh chhuah 130, TrueNAT hmanga hmuh 65, RAT hmanga hmuh 434 leh Fluorescent Immunoassay (FIA) hmanga hmuh pahnih an ni.

IDSP record angin, Mizoramah Covid-19 vei 1,27,548 hmuh chhuah a ni tawh a, mipa 61,788 leh hmeichhia 65,760 an ni a, mipa aiin hmeichhia 3,972-in an tam zawk. Nimin tlai dar 5 thleng khan mi 1,20,944 (95.29%) chhuahtir an ni tawh a, mi 456 (0.36%) thi tawhin, enkawl mek mi 5,517 (4.35%) an awm.

November 11, Ningania Covid-19 vei hmuh chhuah mi 631 zinga mi 362 chu symtom nei an ni a, symptom nei lo mi 255 an awm a; mi 14 erawh chu tarlan chian a ni lo. Ningania swab sample endikah district pasarih chu Covid-19 positivity rate 10% chung lam a ni a; positivity rate san berna Lawngtlai district-ah 24.26% a tling. Positivity rate 10% chung lam awmna district dangte chu - Serchhip 22.71%, Lunglei 20.82%, Mamit 17.00%, Hnahthial 14.92%, Aizawl 14.74% leh Champhai 14.35% a ni.

Mizorama swab sample endik bikah RT-PCR hmanga endik zat percentage chu ni tin a tlahniam hret hret zel a, Rapid Antigen Test (RAT) hmanga endik zat a pung hret hret thung. November 10, 2021 thlenga swab sample endik tawh 13,65,732 aṭanga RT-PCR hmanga endik zat percentage chu 23.31 a ni a, RAT hmanga endik zat chu 70.70% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,27,548 chu mi 1,000 zelah hripui vei mi 116 an awm ang a ni a; mi 1,00,000 zela Covid-19 vangin mi 41 an thi tawh ang a ni. Nimin khan tlai dar 5 thlengin hripui vei dam tawh mi 496 chhuahtir an ni a; Aizawl district-ah 337, Lunglei district-ah 75, Mamit district-ah 32, Kolasib district-ah 20, Lawngtlai district-ah 12, Siaha district-ah pakua, Champhai district-ah paruk leh Hnahthial district-ah panga te an ni.