ZMC nurse 50 lâkah sawipuitu leh Registration nei lo an awm lo - SPIO

Kumin October thla tir lama State Referral Hospital (ZMC)-a thawk tur staff nurse (contract) 50 lâknaa tling zingah nursing registration nei lo an awm nia sawi a nih laiin, SRH-ZMC hotute chuan registration nei lo an awm lo niin an tarlang a; minister, MLA leh sorkar official aṭangin insawipuina lehkha an dawn loh thu an tarlang bawk.

SRH-ZMC-a staff nurse (contract) tura lak mi 50 zingah SRH-a thawk volunteer nurse-te chuan nursing registration nei lo an awm tih an lo sawi tawh a, chu chu media hrang hrangah tarlan a ni. ZMC SPIO (Registrar) erawh chuan RTI Act hmanga zawhna a chhannaah, staff nurse tur lak zingah nursing registration nei lo an awm loh thu a tarlang thung.

Vanglaini-in RTI Act hmanga a zawhna chhangin ZMC SPIO chuan, nurse 50 lâknaah staff nurse recruitment rules ding lai hman a nih thu a tarlang a, "Nurse atana lâkte hian an document an submit vek a, qualification ṭul ang tel lo an awm lo a, nursing registration nei lo pawh an awm lo," a ti.

Staff nurse tur 50 lâknaah hian minister, MLA leh sorkar official aṭanga sawipuina a awma sawi a ni a, hemi chungchangah hian SPIO chuan, "Tun hnaia ZMC-a thawk tur nurse 50 lâk zingah khan minister emaw, MLA emaw, sorkar official emawte'n lâk an nih theihna tura lehkha ziahsak ZMC-in dawn a nei lo," tiin a chháng.

Personal interview hmachhawn lo lâk an awm nia sawi chu sût leh tumna a awm leh awm loh zawhna chhangin SPIO chuan, "Nurse lâk zingah interview paltlang loa lâk an awm lo. Social media lamah interview loa lâk awm anga thuthang a awm a. He thil hi result chhuahnaah tihsual palh avangin interview lo mi pahnih telh palh an ni a, hriat chhuah a nih veleh siamṭhat nghal niin, paih leh nghal an ni. Anni pahnih hi appointment pek an ni lo a, hna atan hian lâk an ni lo," a ti.

SPIO tarlan danin, staff nurse dil theite chu kum 18-35 inkar niin, SC/ST tan kum 5 dang hriatthiam a ni a; thiamna (qualification) ngai chu - registered nurse/ midwife, Mizo ṭawng middle school standard thiam, group A, B & C hna laknaa ṭul ang computer thiamna (proficiency) neite a ni.

ZMC SPIO chuan, 'Nurse hna lâk hi hmanhmawh taka kalpui a ngaih avangin Health & Family Welfare department chuan personal interview hmanga hna lâk kalpui turin a ti a ni," a ti. Staff nurse tur lâk a nih hma hian Covid-19 avanga thawk volunteer nurse mi 103 an awm.

Hna lâk chungchang lehkha a thil telah chuan, September 20, 2021-a Health Minister kaihhruaina hnuaiah Chief Secretary, DPAR leh Finance aiawh meeting thuchhuak, Chief Minister leh ZMC Governing Council-a President pawmpuina anga lâk tur a nih tur thu a chuang. September 20, 2021-ah HFW Under Secretary-in ZMC Director hnenah lehkha thawnin, Vanglaini, The Aizawl Post leh The Zozam Times bâkah, LPS Vision, ZONET Vable TV leh DDK bakah, ZMC website-ahte advertisement chhuah tura tih a ni.

SRH-ZMC staff nurse 50 lâk turah hian mi 1,200-in dilna an thehlut a, mi 724-in interview an hmachhawn. Interview board panga siam a ni a, board pakhatah member mi pathum zel an awm a, chhannaah hian interview board chairman leh member-te hming leh sorkara an nihnate tarlan vek a ni. Board member tura a tira ruat, inkhung ngai leh remchan lohna avanga inthlak mi pahnih an awm bawk.

Staff nurse atana lâk mi 50-te hming, khua/veng leh an mark hmuh zatte zawh a ni a; mahse, Mizoram Information Commission hotute ṭawngkaa an ràwn hnuah, mimal mark hmuh zât pek chhuah dawn chuan an remtihna lâk a ngaih avangin chhàn theih a nih rih loh thu SPIO chuan a tarlang.