ZLP-in Health Care Scheme an fak Rs 2,00,000 thleng bill theih an phût

ZPM Legislature Party (ZLP) chuan thuchhuah siamin, MNF-in an duan thar Mizoram State Health Care Scheme (MSHCS) chu fakawm an tih thu an tarlang a; chutih rualin, scheme hnuaia inziak lutte damdawia inenkawlna senso Rs 1,00,000 thleng bill theih tura tih­hniam chu Rs 2,00,000 thleng bill theiha ti leh turin sorkar an phût.

ZLP chuan, MSHCS chu MNF-in an sorkar hmasak ṭuma mipui tana an buatsaih a nih thu tarlangin, "Mi tam takin he scheme avang hian an damdawi-in senso rulhna tur an neih theih phah. Hnawhsarum deuha tih a nih vang leh expert recommendation ang lo deuha kalpui a nih hnu leh Congress sorkarin a ngaihsak zui lutuk loh avangin a nih tur ang a ni pha ta meuh lo a ni," an ti.

MSHCS hnuaiah damlo inenkawlna sorkar aṭanga hmuh let tur chéng nuai tél tun thlenga batsak an la ni chu an dem tak zet tih sawiin ZLP chuan, "MNF sorkar hian kum 2019 aṭang khan nasa taka tidanglamin, a aia ṭha lehzualin hma an la leh a ni. Mi tam takin innghahna atan an hmang chhoh leh ta a ni," an ti a, MSHCS thar chu October 2019-ah hman ṭan a nih thu an sawi.

ZLP tarlan danin, MSHCS-a inziah luhna senso chu kum khatah BPL chhungkaw tan Rs 100 leh a bak zawng (APL chhungkua) tan Rs 1,000 a ni a, Rs 2,00,000 thleng inenkawlna senso a hmuh leh theih ṭhin.

October-September bîa hun chhiar ṭhin chu sorkar kum April-March anga kalpui tum a nih avangin tunah hian October 2021 aṭanga March 2022 chhung atan inziah luhna man BPL tan Rs 50 leh APL tan Rs 500 lak a ni a, senso hmuh let theih pawh a zatve Rs 1,00,000-ah tihniam a ni.

Registration fee thla 12 atana Rs 100 leh 1,000 lak ṭhin, thla ruk atana Rs 50 leh Rs 500 lak chu lawmawm an tih thu an sawi rualin ZLP chuan, "Damlote senso hmuh lêt theih Rs 1,00,000-a a tla thla hi hriatthiam har kan ti. A hmaa kan pek dan nena khaikhin chuan Rs 1,00,000 bill-na tur chuan inziah luhna atan Rs 25 (BPL) leh Rs 250 (APL) tur ni àwm tak a ni," an ti.

ZLP chuan, Assembly session zawhna chhànnaa a lan danin, MSHCS corpus fund-ah cheng nuai 20,000 chuang a la awm thu an tarlang a, "Mipuite Covid-19 hripuiiin min tihretheih lai mek leh sum awm reng chung sia damlote tana bill let tur a chanvea an tihniam hi mipui tana harsatna lian tak a ni a, kan dem tak zet," an ti a; Rs. 2,00,000 thleng bill leh theih an phût.

Chief Minister-in Assembly session-ah SEDP hnuaia damlo apiangte'n an dawn tur Rs 2,00,000 ṭheuh dah a ni thu a sawi tih tarlangin ZLP chuan, "Chief Minister thusawi leh Rs 1,00,000 chiah bill theih hi a inperhsan hle. Tunah hian MSHCS hnuaiah cheng nuai 4,400 bá la pek theih loh an nei. Hei pawh hi mipui harsatna hrethiama mipui hnena pe vat turin kan phût a ni," an ti.

ZLP chuan, damlote'n damdawi-in an chhuah­san dawnin bill an pek tlâk vek a ngaih thu sawiin, "MSHCS lama bill an thehluh hian hun rei tak nghah a ni ṭhin hi thil manganthlak tak a nih bakah, mipui phurrit belh chhahna a ni," an ti a, damlo na/chau zualte phei chu damdawi-ina luh nawn fo a ngaih thu an sawi.

MNF sorkarin res­tricted tender leh tender pawh awm loa contract inpek an ṭhulh loh thu sawiin ZLP chuan, "Sum awm sa hnuaia pawisa pe chhuak thei lo khan party worker ho contract an hlui thei reng bawk si hi kan hrethiam thei lo. Tuirial by-election neih mekah pawh phûl lem phah thlengin an tiam leh mai theite kha mipui zah lohna dik tak a niin kan hria a ni," an ti.