Bangladesh nen insumdawn tawn turin Hmalakna kalpui zel a ni - R Lalthangliana

Commerce & Industries minister Dr R Lalthangliana chuan, Bangladesh nena Silsury kaltlanga insumdawn tawnna kalpui a nih theih nan hmalak mek zel a nih thu a sawi.

Vanglaini palai zawhna chhangin Dr R Lalthangliana chuan, March 21, 2021-a Bangladesh a tlawh ṭumin Bangladesh Commerce minister Tipu Munshi nen an inkawm thu a sawi a, "Bangladesh Minister nen hian Silsury hi a hmun ngeia tlawh dun kan rél a, mahse, Covid-19 a hluar chhoh leh avangin kan la tlawh thei lo. Biak ka tum reng a, kan la inbe fuh thei rih lo," a ti.

Commerce & Industries Minister chuan, Bangladesh Commerce Minister nen la inbe rih lo mah se, a theih ang anga hmalak zel a nih thu sawiin, "Silsury lamah chuan lei an dawh tawh," a ti a; insumdawn tawnna kalpui theih thuai a nghahhlelh awm thu a sawi.

Dr R Lalthangliana chuan, Myanmar nena insumdawn tawnna chungchang chu Myanmar ram buaina avangin tun dinhmunah chuan bawhzui theih a nih rih loh thu a sawi bawk.

March 21, 2021-a an inkawm ṭumin Dr R Lalthangliana leh Bangladesh Commerce Minister hian April 2021 chawhma lamah Silsuri Border Haat hmun tlawh dun ngei ṭha an tih thu an sawi dun a ni.

Inkawmaah hian Dr R Lalthangliana chuan, Bangladesh nena ramria awlsam zawka insumdawn tawn a nih theih nan Silsury, Tuipuibari, Nunsury leh Marpara khuaa border haat-ah Bangladesh sorkarin an tih ve ngaite an tih thuai thuai a ṭul thu sawiin, "Mizoram sorkar pawhin truck kal theihna turin Silsuri thleng kawng a ruahman tawh a ni," a ti.