KHAWTHLIR

Thisen pe
KṬP, Tanhril Pastor Bial chuan an silver jubilee pualin November 13, Inrinni khan thisen pek an huaihawt a, Synod Hospital tan thisen unit 44 an pe a, petute mipa 36 leh hmeichhia pariat an ni.

Minister-in enfiah
Sports & Youth Services minister Robert Romawia Royte chuan November 13, Inrinni khan Mamit district-a Kawrthah, Tuidam, Bâwngva leh Mamit khuaa infiamna ruhrel siam hna thawh mekte a enfiah. Minister chuan contractor-te chu an hnaa duhkhawp loh laite siamṭha leh tur leh a hun taka zo turin a chah a; khaw hrang hrangah football leh volleyball a pe nghal a ni.

Sikul hawng
Bamboo Development Board vice chairman Dr K Pachhunga, MLA chuan November 13, Inrinni khan a bial Lunglei South huam chhunga Lungrang South-a middle school leh high school sak tharte a hawng. Sikul building tharte hi NABARD sum cheng nuai 26.20 sénga sak a ni.

Sangkhumi lawmpui
ZPM Zonu chuan thuchhuah siamin, India ram chawimawina sang Padma Shri a dawn avangin B Sangkhumi an lawmpui thu an tarlang a, "Hetiang chawimawina sang dawng thei Mizo nu chhuanawm kan nei hi kan chhuang hle a ni," an ti.

Children's Day
Siaha District Legal Services Authority leh Siaha District Child Protection Unit chuan Siaha New Colony-a NSV Studio-ah November 13, Inrinni khan Children's Day an hmang a; Mara Chanô Py president P Chaki, child protection ambassador (mother) ni bawkin a hmanpui. He hunah hian naupangte dikna chanvo inhrilhfiah a ni. Children's Day hi kum tin November 14-ah hman ṭhin a ni.

CS-in tlawh
Chief secretary Dr Renu Sharma chuan November 13, Inrinni khan NLCPR/NEC hnuaia sak mek project pathum - IPR department sak mek Lianchhiari Run, Mualpuia Govt. Aizawl College New Campus leh New Capital Complex-a High Court sak mekte a tlawh.