Ni hnih chhungin hripui vei Mi 1,086 hmuh chhuah a ni

Mizoramah Covid-19 vei November 12, Zirtawpni khan mi 699 leh November 13, Inrinni khan mi 387 hmuh chhuah a ni a, ni hnih chhungin mi 1,086 hmuh a ni. Inrinni leh nimin khan hripui vei mi 656 chhuahtir an ni a, hripui vanga thi mi pathum an awm belh.

Covid-19 vei Novem­ber 12-a hmuh chhuahte chu ZMC laboratory-a hmuh 58, TrueNAT hmanga hmuh 57, RAT hmanga hmuh 544 leh FIA hmanga hmuh 10 an ni a, mipa 366 leh hmeichhia 303 an ni. November 13-a hmuh thar mi 387-te chu mipa 187 leh hmeichhia 200 an ni a, ZMC-a hmuh chhuah 93, TrueNAT hmanga hmuh 24, RAT hmanga hmuh 269 leh FIA hmanga hmuh pakhat an ni.

IDSP record angin, Mizoramah Covid-19 vei 1,28,604 hmuh chhuah a ni tawh a, mipa 62,341 leh hmeichhia 66,263 an ni a, mipa aiin hmeichhia 3,922-in an tam zawk. Nimin tlai dar 5 thleng khan mi 1,22,865 (95.54%) chhuahtir an ni tawh a, mi 460 (0.36%) thi tawhin, enkawl mek mi 5,279 November 12, Zirtawpnia Covid-19 vei hmuh chhuah mi 699 zinga mi 423 chu symtom nei an ni a, symptom nei lo mi 244 an awm a; mi pahnih erawh chu tarlan chian a ni lo. Mi 699 zingah Ṭawngṭai Bethel Camping Centre, Sakawrtuichhuna mi 143 (mipa 124 leh hmeichhia 19) an tel.

Zirtawpnia swab sample endikah district pasarih chu Covid-19 positivity rate 10% chung lam a ni a; positivity rate san berna Serchhip district-ah 40.74% a tling. Positivity rate 10% chung lam awmna district dangte chu - Champhai 25.48%, Lunglei 18.10%, Hnahthial 13.89%, Lawngtlai 13.51%, Aizawl 12.09% leh Mamit 11.83% a ni.

November 13, Inrinnia Covid-19 vei hmuh chhuah mi 387 zinga mi 201 chu symtom nei an ni a, symptom nei lo mi 183 an awm a; mi pathum erawh chu tarlan chian a ni lo. Inrinnia swab sample endikah district panga chu Covid-19 positivity rate 10% chung lam a ni a; positivity rate san berna Champhai district-ah 37.27% a tling. Positivity rate 10% chung lam awmna district dangte chu - Serchhip 24.32%, Mamit 18.75%, Aizawl 17.68% leh Lunglei 14.03%-te a ni.

Mizorama swab sample endik bikah RT-PCR hmanga endik zat percentage chu ni tin a tlahniam hret hret zel a, Rapid Antigen Test (RAT) hmanga endik zat a pung hret hret thung. November 13, 2021 thlenga swab sample endik tawh 13,72,318 aṭanga RT-PCR hmanga endik zat percentage chu 23.26 a ni a, RAT hmanga endik zat chu 70.82% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,28,604 chu mi 1,000 zelah hripui vei mi 117 an awm ang a ni a; mi 1,00,000 zela Covid-19 vangin mi 42 an thi tawh ang a ni. Nimin khan tlai dar 5 thlengin hripui vei dam tawh mi 371 chhuahtir an ni a; Aizawl district-ah mi 191, Champhai district-ah 98, Lunglei district-ah 41, Serchhip district-ah 19, Mamit district-ah 11, Kolasib district-ah paruk, Hnahthial district-ah pali leh Lawngtlai district-ah pakhat an chhuak. Inrinni khan mi 285 an chhuak bawk.