Endik rûnpuiah sikserh vei mi 87 hmu

State Vector Borne Diseases Control Programme (SVBDCP) chuan tunlai hian Mizorama sikserh tamna district pathum - Lunglei, Lawngtlai leh Mamit district-a khua ṭhenkhat, mi chêng 1,000 zela sikserh vei mi panga aia tam awmna khuaah thisen endik rûnpui, Mass Screening & Treatment (MSAT) an kalpui a; mi 6,986 endik zingah sikserh vei mi 87 an hmu chhuak tawh.

Endik rûnpuiah hian district pathumah mi 6,986-te endik tawh niin, chuta ṭang chuan sikserh vei mi 87 (1.24%) hmuh chhuah a ni tawh a, malaria Plasmodium falciparum (Pf) mi 72 leh Plasmodium vivax (Pv) mi 15 an ni.

Lawngtlai district bikah thisen endik mi 4,064 zingah sikserh vei mi 57 (1.40%) hmuh niin, Pf mi 46 leh Pv mi 11 an ni a, Mamit district-ah mi 2,766 endik niin, sikserh vei mi 30 (1.08%) hmuhte chu Pf mi 26 leh Pv mi pali an ni. Lunglei district-ah erawh chuan mi 156-te thisen endik ni mah se, sikserh vei hmuh chhuah a ni lo.

MSAT hi sikserh vei hmuh chhuah lohte hmuh chhuah nan leh sikserh darh zel tur venna tura kalpui a ni a; SVBDCP consultant mi pali, Aizawl aṭanga kalte chu district-a Health department-a thawktute'n an ṭawiawm. Endikna khuaa mihring awm zawng zawng aṭanga 90% talte thisen endik ṭhin a ni a, sikserh vei an hmuh chhuahte chu a thlàwnin damdawi an pe nghal zel a ni.

Health department tarlan danin, kumin January aṭanga September thlengin Mizoramah mi 2,19,040-te thisen endik tawhah sikserh vei mi 4,727 hmuh chhuah a ni tawh a; hmuh chhuah zat hi endik zat aṭangin 2.16% a ni. Sikserh vanga thi mi 10 an awm tawh bawk.