IAS Corner leh Mega Hybrid Coaching

Mizoram Youth Commission (MYC) chuan Mizoram State Library-ah IAS Corner an siam dawn a, December 11, 2021-ah Mega Hybrid Coaching atana exam an buatsaih dawn.

Vanglaini palaiin a kawmnaah MYC chairman Dr Vanlalṭanpuia, MLA chuan, MYC-in central service chauh a huam loh thu leh kawng hrang hranga ṭhalaite theihna hâi chhuah chu an tum a nih thu a sawi a, "Chutihrualin, tunah hian IAS-ah Mizo kan tlem tawh em em a, hemi kawnga ṭhalaite an phûr nan leh central service-a Mizo kan tam theih beiseiin IAS Corner leh mi 100 tan Mega Hybrid Coaching kan buatsaih dawn," a ti.

Mizoram State Library-a IAS Corner siam turah IAS coaching centre ṭhaa an lehkhabu hman ang an dah dawn thu leh chuta tan chuan Rs 10,00,000 an ruahman thu sawiin Vanlalṭanpuia chuan, "Lehkhabu eng emaw zat kan lei tawh a, Delhi aṭangin a lo thlen thuai kan beisei," a ti a; MYC in Delhi-a an thawhpui Alternate Learning System (ALS) kaltlangin lehkhabute an lei thu a sawi.

Dr Vanlalṭanpuia chuan, Mega Hybrid Coaching chu ALS nen thawkhoa an kalpui dawn thu sawiin, Aizawl, Lunglei, Siaha leh Kolasib-a MYC Centre-ah state level scholarship exam an buatsaih dawn tih Vanglaini palai a hrilh a, "December 1, 2021-a class ṭan theih tura tih kan tum a, mahse, duh aiin ṭhalaiteah thâwm a la nei lian loa kan hriat avangin hun kan pawtsei," a ti a; January 10, 2022-a class ṭan turin December 11, 2021-ah exam an buatsaih dawn thu leh form fill-up hun an hawn mek thute a sawi a ni.

MYC Chairman chuan, Mizo ṭhalai zingah central service lama kal tumna nei an tam loa a hriat thu leh dilna hun an hawn mek chu ṭhalaite'n hria se a duh thu a sawi a, "Programme chi hrang hrang kan buatsaihah ṭhalaite an kal hum hum a, tunah mi 100 tan mega hybrid coaching kan buatsaih dawn a, hemi atan hian mi 200 vel chauhin dilna an la rawn thehlut a ni," a ti.

Dr Vanlalṭanpuia chuan, MYC hmalakna chu politics-a inbeihna atana hman a duh loh thu leh party hrang hrangte chu ṭhalaite tana ngaihtuahna sêngho tura a duh zawk thu te, Mega Hybrid Coaching-a tling mi 100-te chu MYC-in cheng nuai 60 séngin kum khat chhung a buaipui dawn thu te, coaching chu online leh offline-a kalpui tur a nih thu te, MYC centre paliah online coaching kalpui a nih dawn thu leh, offline atan ALS-a faculty-te an chah chhuah dawn thute a sawi bawk.