Covid-19 vangin mi 460 thi tawh

Nimin khan tlai dar 5 thlengin Covid-19 vanga thi an awm lo a, November 12, Zirtawpni zanah mi pakhat leh November 13, Inrinniah mi pahnih an thi thung. Nimin tlai dar 5 thlenga Mizorama Covid-19 vanga thi chu 460 an tling tawh a, November thla bikah mi 28 an thi tawh.

November 12, Zirtawpni zan dar 8 khan H Zopari (78), Ramhlun South chu State Refferal Hospital-ah a thi a, natna dang nei tel a ni. Covid-19 positive a ni tih November 11 khan hmuh chhuah a ni a, SRH-ZMC-ah enkawl nghal a ni.

November 13, Inrinni zing dar 7 khan Lalrinsanga (33), Ramthar Veng, Aizawl chu hripui vangin an inah a thi a; Covid-19 vei a ni tih November 11 khan hmuh chhuah niin, an in lama inenkawl a ni. Inrinni vêk zan dar 8 khan RKH Zaihlira (77), Bethlehem Vengthlang pawh SRH-ZMC-ah a thi a; Covid-19 positive a ni tih November 9 khan hriat chhuah a ni a, SRH-ah dah luh nghal a nih thu sorkar thuchhuakin a tarlang.