Covid donaah CM, Health Minister leh thawktu dangte an thawk ṭha - Dr Vanlalṭanpuia

Mizoram Youth Commission chairman Dr Vanlalṭanpuia, MLA chuan, Covid-19 donaah Chief Minister, Health Minister leh thawktu dangte an thawk ṭha niin a sawi.

November 13, Inrinnia a bial Lunglei North khaw hrang hranga an party-a mi a lawm luhnaah Dr Vanlalṭanpuia chuan, "Covid hian khawvel sorkar ropui tak takte a titláwm a, India leh Mizoram thlengin nasa takin min tibuai. Hetih lai hian kan Chief Minister leh Health Minister-te'n Covid doa kan hmalaknaah an thawk ṭha hle a ni," a ti.

Dr Vanlalṭanpuia chuan, hripui donaah minister, MLA, kohhran, tlawmngai pawl leh task force-te thawhhona a ṭhat thu sawiin, "Sorkar leh mimal thlengin kan thawhhona a ṭha em em a, hengte avang hian Mizoramah pawh Covid-19 a kiam hret hret mek zel," a ti a, báng loa ṭawngṭai zel turin Mizo mipui a sáwm.