Police-in ar chaw ṭha lo an man

Vaivakawn police-te chuan tun hnai khan hnam dang lirthei aṭangin ar chaw siam danglam eng emaw zat an man.

Thu dawn danin, Japfa ar chaw bag-ah, ar chaw chhe tak thunin an ṭhui leh a, chu chu thingtlang hmun hrang hrangah man tláwm tak taka zawrh chhuah leh ṭhin a ni. Hemi chungchanga Mizoram Poultry and Feed Dealer Association-te'n complaint an thehluh bawhzuiin, Vaivakawn police-te chuan ar chaw siam danglam chu an man ta a ni.

Mizoram Poultry and Feed Dealer Association chuan thuchhuah siamin, Vaivakawn police-te chungah an lawm thu tarlangin, "Ar chaw siam danglam hmanga Mizo mipuite buma kan awm ṭhin hi pawi kan ti tak zet," an ti a, ar chaw zuar chhawngte pawh hlawkna ringawt um loa lo fimkhur turin an ngen.