Chhawmdawlna thilpek inhlan chhawng

Lawngtlai DC Dr Andrew H Vanlaldika hmalakna-a Akshaya Patra Foundation, Bangalore aṭanga Lawngtlai district-a Covid-19 hri leng vanga inkharkhip tuar chhungkaw khawsak harsate ṭanpuina ei tur leh nitin mamawh dil chhuahte chuan tunhnai khan Lawngtlai a thleng a, Lawngtlai khawpui chhunga village level task force (VLTF)-te kutah an huam chhunga a dawng tur thlan chhuahte hnena an lo hlan chhawn atan hlan a ni.

DC pisa tuala chhawmdawlna hlan inkhawm buatsaihah Dr Andrew H Vanlaldika chuan, "Kan district-a hri leng tuartu chhungkaw tam tak harsatna an thlente ngai pawimawha Akshaya Patra Foundation, Bangalore-te an rawn luang chhuak hi a lawmawm takzet. An thil ṭha tih hian kan district chhunga chhungkaw tam tak harsatna a chhawkin, district mipuite paw'n an hre reng tawh dawn a ni," a ti.

Addl. DC James Miahlung chuan Akshaya Patra Foundation-te nen an indawr dan sawiin, "Ei tur leh ni tin mamawh item hrang hrang sawm pariat khung khawmna 'happiness kit' an tih bawm 1,914 an rawn thawn," a ti a, happiness kit bawm khat hi chhungkaw pakhat chan zel tur a nih thu a sawi.

Happiness kit bawmah hian - chakki atta, buhfai, chhangphut, moong dal, chana, poha, tel, masala, hmarcha dip, aieng, chi, biscuit, hmai tuamna, ha nawhna, ha hlo, sahbawn, sanitary pad leh notebook a awm a ni.

Chhawmdawlnate hi Lawngtlai district chhunga RD block paliahte incident commander-te kal tlangin chhungkaw thlan chhuahte hnenah sem chhunzawm zel a ni ang.