Ramriah hma la lo tura tihna Darkar 72 chhunga sût turin JAC on ILFRD-in CS an hriattir

16th November, 2021

Joint Action Committee (JAC) on Inner Line Forest Reserved Demand (ILFRD) chuan chief secretary Renu Sharma chu Mizoram leh Assam ramri bul vela hma la lo tura tihna thupek sût turin an phût a; nimin tlai khan Chief Secretary hnenah hian lehkha an thehlut.

Thupek sût tura hriattirna an thehluh hmain JAC on ILFRD hruaitute chuan Aizawl Press Club-ah thuthar thehdarhtute an kâwm a; Ministry of Home Affairs thu anga Mizoram leh Assam ramria hmalakna titawp (status quo) tura thupek chhuah a ni chu an lungawi loh thu sawiin, "Hetianga order chhuah a ni hi ṭha kan ti lo tak zet a, a tàwp thlenga dodal kan tum. MHA thil tih dan hi hleih nei taka thil tihnaah kan ngai," an ti.

JAC on ILFRD hruaitute chuan, status quo kengkawh tura thupek chhuah chu an hriat theih chinah Mizoram Home Minister-in a hriatpui lo tak taka an ngaih thu sawiin, "MHA lamin Assam CM Himanta Biswa Sharma an ngam lohzia kan hria a, chuvangin, MHA thu hmuin Chief Secretary hian Home Minister hriattir loin order a chhuahtir a ni thei," an ti a, Chief Secretary thil tih dan an dem thu an sawi.

Ramria hmalakna tihtawp ringawt bakah thil dang tih tum a awm nia an hriat thu sawiin JAC hruaitute chuan, "Aitlang leh Buarchep ram vela Mizo huan leh loneitute pawh an hmalakna tihtawptir tumna a awm niin kan hria a, ṭha lo kan ti tak zet a ni," an ti.

Mizoram sorkarin ramria status quo kengkawh tura a tihlaiin Assam lam chuan hma an lak chhunzawm zel tho nia sawiin JAC hruaitute chuan, "Keini lam kan chawlh laia Assam lamin hna an thawk bik hi pawi kan ti. Kan Home Minister hian a hriatpui lo takzet a nih chuan ngati nge sût leh tura hma a lak loh tih hi kan zawhna a ni," an ti a; Home Minister chu order tihtawp a nih theihna atana hma la turin an phût.

JAC on ILFRD hruaitute chuan, MHA chu Mizoram leh Mizo mipui zahna nei miah loa thil tia puhin, "He order hi darkar 72 chhunga sût turin kan phût a, sût a nih loh chuan a tàwp thlengin kan dodal ang," an ti.

Tarlan tawh angin, Home department chuan November 8, 2021 khan Mizoram leh Assam ramri depa awm district pahnih - Kolasib leh Mamit DC-te hnenah lehkha thawnin, ramri-ah hmalakna neih loh tur a nih thu an hriattir a ni. Hemi chungchang hi Home minister Lalchamliana chuan a hriat loh thu Vanglaini a hrilh.

Home department chuan, Kolasib leh Mamit DC-te hnenah Mizoram leh Assam ramri buai laiah chuan hmalakna neih loh tur (status quo) a nih thu a hriattir a; hei hi November 5, 2021-a MHA aṭanga thu an dawn anga tih a nih thu an tarlang.

Kolasib DC chuan, Home department aṭanga a thu hmuh bawhzuiin November 10, 2021 khan Vairengte SDO (Civil) leh Bairabi SDC hnenah lehkha a thawn a; ramri buaiah hmalakna nei lo tur leh construction work-te titawp turin a hriattir nghal a ni.