ASF vanga vawk thi a tlahniam

Mizoramah vawk hri, African Swine Fever (ASF) vanga vawk thi a tlahniam tial tial. Kumin October thla ni 1-15 chhung khan ASF vangin Mizoramah vawk 589 a thi a, November thla ni 1-15 chhungin ASF vanga vawk thi 67 chiah a awm thung.

Animal Husbandry & Veterinary (AH&Vety) department-in ni tina Mizorama ASF vanga vawk thi zat report a tihchhuaha a lan danin, October thla chhung khan ni tin ASF vanga vawk thi a awm a, an vaiin vawk 1,116 a thi. Vawk thi tam ber ní October 20-ah vawk 79 a thi a, vawk thi tlem ber ni October 29-ah vawk pariat a thi a ni.

Nov. thla kal mek chhungin nimin thleng khan ASF vangin vawk 67 a thi tawh a, November 1 kha vawk thi tam ber ní niin, 14 a thi a; November ni 5, 10, 13 leh 14-ahte ASF vanga vawk thi a awm lo.

Nimin khan ASF vanga vawk thi pahnih a awm a, Mizorama ASF vanga vawk thi zawng zawng chu 29,728 a ni a, vawk 10,380 suat a ni tawh.

Mizorama district zawng zawngah ASF lenna khua/veng, infected area 271-a awm tawh a; ASF infected area-a puan loh, vawk hri lênna nia rinhlelh khua/veng 96-ah chhan hriat loa vawk thi 533 a awm tawh bawk.

AH&Vety department chuan, Ministry of Fisheries, Animal Husbandry and Dairying-ah ASF vanga vawk suat neitute tan zangnadawmna an dilsak a, August 31, 2021 thlenga sorkar laipuia dilna an thehluha a lan danin, Mizoramah ASF-in a tihbuai chhungkua 8,129 an awm.

ASF-in a tihbuaite chu Aizawl district-ah chhungkaw 4,713, Lunglei district-ah 1,352, Siaha district-ah 66, Champhai district-ah 20, Kolasib district-ah 17, Serchhip district-ah 897, Lawngtlai district-ah 233, Mamit district-ah 932, Khawzawl district-ah 228, Saitual district-ah 293 leh Hnahthial district-ah 256 an awm a ni.