MGS-in Mizo ṭawngah rawtna thlen
Mizo Grammar Society (MGS) hruaitute chuan nimin khan Human Resources Development Board (HRDB) vice chairman L Thangmawia, MLA an hmu a; Mizo ṭawng hmasawnna tura sorkar hmalakna chungchang sawipuiin, MGS hmalakna leh rawtnate an thlen.
L Thangmawia chuan, Chief Minister-in Mizo ṭawng hmasawnna a ngaih pawimawh avang leh HRD Board chu hma la tura a tih avangin Mizo Language Board (MLB) din tura hma lak mek a nih thu a sawi a, "Harsatna dang a awm loh chuan kum thar budget session-ah MLB buatsaih bill hi School Education minister Pu Lalchhandama Ralte-in Assembly House-ah a put luh hman beisei a ni," a ti.
MGS hruaitute chuan, Mizo ṭawng chungchanga inhnialna tam tak chu grammar aṭanga chinfel theih a nih thu te, hnam humhalh nan Mizo ṭawng dik a pawimawh thu te, MBSE hnuaia Mizo Language Committee (MLC)-in Mizo ṭawng ziah dan Third Edition a siam chungchangah rawtna an thlen thute an sawi.
MBSE aṭanga ngenna an dawn bawhzuia MLC kaihhruaina nena inmil lo pawl 9 aṭanga pawl 12 inkar Mizo zirlaibu an zir chian mek thu te, Doordarshan Kendra leh All India Radio-ah Mizo ṭawng grammar pawimawhna leh ṭangkaina lam hawi programme an neih mek thu leh, sorkar hmalaknaah MGS chuan theihtawp chhuah an inhuam thute an sawi bawk.
Inkawmnaah hian Mizo ṭawng hmasawn nan leh hnam inpumkhat nan khawvel hmun hrang hranga cheng Zo fate nen biak hmuh theihna hmanga Mizo ṭawng inpàwl khawmna (international webinar) nei turin MGS leh HRD Board-te'n hmalak tlan ni se an ti a ni.