KHAWTHLIR

Mini Kiosk thar
Health & Family Welfare department chuan, Selesih Local Council House chu Rapid Antigen Test hmanga swab sample endikna, Covid-19 Testing Mini Kiosk-ah a puang.

Insawn tur dang
Mizo Students' Union (MSU) sub-headquarters, Keiṭum chuan an khuaa health worker thawk lai RC Laldailova, Keiṭum chu Bairabi-a sawn tura tih chu an duh loh avangin Bairabi-a joining report pe tura RC Laldailova'n nimin zinga Keiṭum a chhuahsan tur an dang. RC Laldailova chu a post ngaia dah leh turin Mizoram sorkar an phût thu leh an phût chu a hlawhtlin hma chuan hma an lak zel dawn thu an tarlang.

Raltlante tanpuina pe
Full Life Access Trust (FLAT)/Nuntam Kailawn, Lunglei leh Zo Indigenous Forum (ZIF), Aizawl ṭangkawp chuan Myanmar buaina avanga Mizorama rawn raltlante hnenah ṭanpuina an pe.Pawl pahnih hruaitute hian raltlante awmna khaw pasarih - Sangau, Pangkhua, Thingsai, Bualpui-H, Ngharchhip, New Ngharchhip leh Cherhlun khuate an tlawh a, ṭanpuina chi hrang hrang - taksa faina leh hriselna atana pawimawh thil te, bungbel, tél, dailuah, water filter, buhfai, silpauline, tuizem leh naupang tan lehkhabu eng emaw zat an pe a ni.

Ngaihchân tur
Mizoram sorkar chuan, tun hnaiah Samagra Shiksha, Mizoram kaltlanga middle school leh high school-a thawk tur CSS Hindi zirtirtu (contractual basis) lakna tura interview neih hun chungchangah thuthang dik lo thehdarh a nih thu leh interview hun tur chu sorkarin a ngaihtuah mek thu a tarlang a, diltute chu official-a interview hun tur puanzar ngaichâng turin a chah.

Kuhva rah man
Assam Rifles sipaite leh Champhaia Customs department chuan nimin khan Champhai Ruantlang huam chhungah kuhva rah ip 79 an man a, a neitua puh mi pahnih an man nghal bawk. Kuhva rahte hi Rs 24,64,800 mana chhût a ni a, Customs department-in an hréng zui a ni.