MNF-in Padma Shri dawngte chawimawi ; Hnam tana la pên chhuak ve lote'n kan President case chi tin an awrhtir - MNF VP

Tun hnaia Padma Shri dawngtu zinga pahnih - Lalbiakthanga Pachuau leh B Sangkhumi te chu nimin khan MNF party-in Mizo Hnam Rûnah chawimawina an hlân. Thusawitu MNF vice president Lalthlengliana chuan, "Hnam tana la pên chhuak ve lote'n kan president hêkin, case chi tin an awrhtir a ni," a ti.

Lalbiakthanga Pachuau leh B Sangkhumi te hi MNF High Command member ve ve an ni a; chawimawinaah hian MNF vice president pahnih Vanlalzawma leh Lalthlengliana ten parṭhi an hlàn a ni.

Lalthlengliana chuan, Lalbiakthanga Pachuau leh B Sangkhumi te chu India ram mipui tam takin an dawn theih loh chawimawina sang dawng an nih thu sawiin, "A ropui kan ti tak zet a, MNF chuan kan lawmpuiin chawimawina kan hlan a, kan chhuang hle a ni," a ti.

Roreltute chu Pathian ruat an ni tih sawiin Lalthlengliana chuan, "Tuna hnam hmangaih ber anga insawite hian London khu hnam tan vawi khat pawh an la thleng ve lo. Kan ram tana la pên chhuak ve miah lote'n kan president hêkin, case chi tinréng an awrhtir a, Lalpa'n roreltute a ruat hi tawrh a phal a ni," a ti a; MNF hun tawn tawh hrang hrangte a sawi lang.

MNF Vice President chuan, India leh MNF inremna chungchang sawiin, "Kan inremnaah khan Article 371G kan nei a, inremna ṭha leh ropui tak a ni. Ram hmangaih intitu tam tak hian Indian Constitution chhun han khat pawh an tidanglam ve lo. Pathianin kan ram hruai turin harsatna tinrêng kan hotute kha a tuartir a ni," a ti.

MNF sorkar thil tihte sawiin Lalthlengliana chuan, mautàm ṭàm kumah free ration an sem thu te, gas a awlsam thu te, Durtlang kawng an siam thu te, New Secretariat Complex, Millennium Centre, Ch.Chhunga Bus Terminal, Rangvamuala Ch.Saprawnga Truck Terminal-te an siam thu te, tuna sorkar kal mekah hmun hrang hrangah kawngpui four lane laih mek a nih thu te, buhfai, gas leh tuialhtheiah harsatna a awm loh thu te, Mizoram chu Covid donaa a ti ṭha ber state a nih thu te, sorkar hnathawk hrang hrang lak a nih thute a sawi bawk.

Lalthlengliana chuan, sorkar kal tawhah ramri chungchangah zirlaite'n hliam an tawrh thu a sawi a; 'Kalphung thar' titute chu engtikah mah an sorkar dawn lo nia sawiin, "Kum 2023 inthlan awm leh turah hian Pathianin MNF hi chawi sangin ropui takin a sorkartir leh ngei dawn a ni," a ti.