Kut themthiam zirna khâr a ni

Handicrafts Service Centre-in Chite Venga thla hnih chhung kut themthiam zirna, Handicraft Technical Training Programme an buatsaih chu nimin khan khâr a ni a, AMC Ward-VIII councillor Christina Roluahpuii Sailo-in a hmanpui.

Christina Roluahpuii Sailo chuan, sorkar hnain mi tin a daih vek lo tih sawiin, "Dinhmunin a zir loh avanga sorkar hna thawk tura thiamna nei lote pawh awm theih a ni. Mahse, chung mite tan chuan eizawnna tur dang a awm lo tihna erawh a ni lo. Pathianin mihringte hi thiamthil (talent) hrang hrang min pe a, kan talent-te hi kan tihpun phawt chuan eizawnna atan hman tlak a ni ṭhin. Kut themthiamte'n an talent an tihpunna tura training buatsaih a ni hi a lawmawm tak zet," a ti.

Handicrafts Service Centre hotu Kaphnuni chuan, ṭhalai eng emaw zat chu an hmun aṭangin an inzir chhuah tawh thu sawiin, "Hmanrua duh ang anga hman tur kan la neih tam tâwk loh avangin duh angin training kan kalpui thei lo. Kan hun leh hmunin a tlin tâwk loh avangin duh anga rei training kan inpe thei lo a, duh angin a zir chhuakte'n an thiam nâl theih loh phah ṭhin a ni," a ti.

Training-ah hian mi 20-in hnâng hmanga thil chi hrang hrang siam an zir chhuak a ni.