Minister hoin rualbanlote hamṭhatna sawiho

State Advisory Board on Disability chu nimin khan Secretariat conference hall-ah Social Welfare minister Dr K Beichhua hoin an ṭhukhawm a, rualbanlote hamṭhatna hrang hrang an sawiho.

Social Welfare Minister chuan, khawvel changkang zelah pianphunga rualbanlote'n ngaih pawimawh an hlawh chho mek tih sawiin, "Rualbanlote pawhin an dikna chanvo an hre chho ve zel. Sorkar, khawtlang leh mimal angin an dikna chanvo kan hriatsak a, kan ngaih pawimawh tulh tulh a pawimawh," a ti.

Meeting-ah hian SWD leh Differently Abled Society of Mizoramte nen ṭangruala Covid-19 léng kara pianphunga rualbanlote tana Aizawl leh Lengpui area-a ṭanpuina an pekte thlirlet a ni a; rualbanlote chhawmdawlna atan state fund neih chungchang an rêl bawk.

Vantlang punkhawmna, in leh khawlaiahte pianphunga rualbanlote tana harsatna awm lo (barrier free) a nih theih nan department hmalaknate thlirho a ni bawk a; vantlang punkhawmna hmun hrang hrangah wheelchair leh rualbanlo dangte kal theih tura siam chungchangah zirtirna neih tam a la ṭul hle tih tarlang a ni.

Ṭhutkhawmah hian December 2018 leh March 2019 inkara Mizoram puma pianphunga rualbanlote dinhmun zirchianna Debashis Mukherjee-a buatsaih enho a ni. Kum 2011 chhiarpuiah Mizoramah pianphunga rualbanlo mi 15,160 an awm a, Debashis Mukherjee zirchiannaah chuan mi 13,524 zawn chhuah niin, chung zinga mi 13,418 chu thu zawh an ni a, an zinga 106 erawh chuan interview neih an duh lo thung.