Creation of Role Model School leh Auro Scholar Programme hawng

School Education department hnuaia Samagra Shiksha leh Sri Aurobindo Society-te thawh dunnaa Auro Scholar Programme leh Creation of Role Model School tih an duante chu nimin khan School Education secretary Dr Lalzirmawia Chhangte-in a pisaah a hawng.

Programme hawngtu Dr Lalzirmawia Chhangte chuan, Mizoram Samagra Shiksha leh Sri Aurobindo Society-te'n March 12, 2018 khan thawh dunna Zero Investment Innovations for Education Initiatives (ZIIEI) an lo ziak tawh tih a sawi a, "Zero Investment Innovations programme-ah hian Samagra Shiksha project director Pu Lalhmachhuana pawhin certificate of honour a dawng tawh a ni," a ti.

Dr Lalzirmawia sawi danin, Zero Investment Innovations programme-ah hian naupangte'n application hmangin an inziak lut thei dawn a; 'Creation of Role Model School' tih pawh Pathshaala Apps niin, zirtirtute'n an duh dan mila nuam taka naupangte an zirtirna tura puitu atana duan a ni. Pathshaala Apps atan hian sikul 26 thlan a ni dawn a, Mizo naupangte'n an hlâwkpui ngei beisei a ni.

Rupantar Aurobindo Society manager Shashank Sivastava chuan, Mizoram Samagra Shiksha nena an thawh dunna ang chu India rama state leh union territory 36-ah an kalpui tawh thu a sawi a, "Programme hian zirtirtute chu zirtir tur chhawp chhuahsak leh zirlaite an zir laia chak lo deuhte a pui thei dawn a ni," a ti.

Samagra project director Lalhmachhuana chuan, programme hawn tâk hmangin naupangte'n an zirlai an thiam leh thiam loh online hmangin an inenfiah ang a, an thiam dan azirin scholarship an dawng thei dawn tih a sawi a, "Scholarship hi he programme tum ber a ni lo a, ni tina an zir ennawn lehna atan kori a tu dawn a, hei hi a pawimawh lai zawk chu a ni," a ti a; pawl 1-12 thleng a huam dawn tih a sawi.