Dâwta mipui bum lo turin MNF chah

BJP, Mizoram Pradesh chuan thuchhuah siamin, dâwt ringawt hmanga mipui hmaa thusawi lo tur leh mipui bum tawh lo turin MNF party hruaitute an chah.

Mizoram BJP chuan, Sports minister Robert Romawia Royte-in November 12, 2021-a Mizo Hnam Rûna a thusawi chu mipui bumnaa an ngaih thu tarlangin, "Mipui mai ni lo, an party mite ngaihnêpna hial niin kan ngai. Hetianga ram hruaitute'n dâwt ringawt hmanga mipui hmaa thusawi hi ti tawh lo turin kan ngen a ni," an ti.

MNF chu Mizo mipui tawrhna pawisa loa ramhnuai aṭanga flag vár nena haw an nih thu sawiin BJP chuan, "MNF party hian India ram political party-te kalhmang leh zahawmnate hre turin BJP Mizoram Pradesh chuan naute zilhin a hriattir nghal a ni," an ti a; BJP chu khawvela political party lian ber leh member ngah ber a nih thu leh BJP MP ṭhenkhat vote hmuh zat MNF party member zawng zawngin an zat loh thu an tarlang.

Mizoram BJP chuan, India ram pum leh hmarchhak state-te tan MNF president Zoramthanga chu zah emaw, chung en emaw chhan tur a awm lo tih sawiin, "Amah zah avanga kûna a ke phah vuana chibai bûkna tur a awm hek lo. Amah Pu Zoramthanga pawhin Central sorkar leh Mizoram political party dangte nuihzatbûr (mockery) a ni tih a inhmuh chian lehzual a ṭul hle a ni," an ti. Mahni duh záwng chief secretary dah thei lo CM Zoramthanga chuan Governor hnenah bànna thehluh nghal chiah tih tur a nei niin an sawi bawk.