Covid-19 vangin mi 463 thi tawh

Nimin khan tlai dar 5 thlengin Covid-19 vanga thi mi pahnih an awm thu sorkar thuchhuakin a tarlang a, November 14, Pathiannia thi pakhat tarlan thar a awm bawk; an vai hian natna dang nei tel vek an ni. Nimin tlai dar 5 thlengin Mizoramah Covid-19 vangin mi 463 an thi tawh a, November thla bikah mi 31 an thi tawh.

November 14, Pathianni chawhnu dar 3:58 khan Zamliani (72), Serchhip Hmarveng chu Serchhipa dedicated covid health centre (DCHC)-ah a thi a, Covid-19 positive a ni tih October 30, 2021 khan hmuh chhuah niin, DCHC-ah dah luha enkawl nghal a ni.

Nimin zing dar 4:15 khan Chawnbia (85), West Phulpui, Mamit district chu State Refferal Hospital-ah hripui vangin a thi a, Covid-19 vei a ni tih October 16 khan hmuh chhuah niin, October 18 aṭangin SRH-ah enkawl a ni. VL Hmuaka (87), Khawrihnim, Mamit district pawh nimin zing dar 9:30 khan SRH-ZMC-ah a thi a, hripui vei a ni tih October 22 khan finfiah niin, SRH-ah dah luh nghal a ni.