CITUM-in pisa kái tur dan an tum

Centre of Indian Trade Union, Mizoram (CITUM) chuan Mizoram Building and Other Construction Workers Welfare Board (MBOCWWB) pisaa thawk pakhat chu pisa dawr ṭhinte harsatna siam ṭhinah puhin, sawn turin MBOCWWB Secretary, LESDE Director ni bawk an ngen a, an ngen anga sawn a nih loh avangin harsatna siamtua an puh chu a pisa kái tur dan an tum.

CITUM aṭanga thu dawn danin, MBOCWWB pisaa thawk Lalhmingmawii'n pisa dawrtute ṭawngkam mawi lo taka chhángin, beidawng takin a siam fo a, MBOCWWB chu kut hnathawktu, mi harsa leh chincháng hre lo zawkte tan harsatna a siam ṭhin avangin November 1, 2021 khan MBOCWWB Secretary leh Labour, Employment, Skill Development and Entrepreneurship (LESDE) Director hnenah ziakin an zualko a, Lalhmingmawii chu chawlhkar khat chhunga sawn chhuak turin an ngen a ni.

CITUM hian November 10, 2021 thlenga hmalakna an hriat loh avangin nimin aṭang khan Lalhmingmawii pisa kai tur chu dan an tum a, mahse khua a nawm loh avangin an ṭhulh rih a, dan ngei erawh an tum nia thu dawn a ni.