COVID-19: Mizoram dinhmun ; Hripui vei mi 171 hmuh belh a ni

November 14, Pa­thian­ni khan Mizoramah swab sample 1,076 endik aṭangin Covid-19 vei mi 171 hmuh chhuah a ni a, positivity rate 15.89% a ni. Nimin khan hripui vei dam tawh mi 476 chhuahtir an ni a, hripui vangin mi pahnih an thi.

Covid-19 vei Pathian­nia hmuh chhuah mi 171-te chu Rapid Antigen Test hmanga hmuh vek an ni a, mipa 70 leh hmeichhia 101 an ni. TrueNAT hmanga sample pali endikte a negative vek a, ZMC laboratory-ah leh FIA hmangin sample endik a ni lo.

IDSP record angin, Mizoramah Covid-19 vei 1,28,775 hmuh chhuah a ni tawh a, mipa 62,411 leh hmeichhia 66,374 an ni a, mipa aiin hmeichhia 3,963-in an tam zawk. Nimin tlai dar 5 thleng khan mi 1,23,365 (95.80%) chhuahtir an ni tawh a, mi 463 (0.36%) thi tawhin, enkawl mek mi 4,947 (3.84%) an awm.

November 14, Pathiannia Covid-19 vei hmuh chhuah mi 171 zinga mi 98 chu symtom nei an ni a, symptom nei lo mi 67 an awm a; mi paruk erawh chu tarlan chian a ni lo. Pathiannia swab sample endikna district pariatte chu Covid-19 positivity rate 10% chung lam vek a ni a; positivity rate san berna Serchhip district-ah sample endik zawng zawng an positive vek (100%) a, Lunglei district-ah 26.74% leh Khawzawl district-ah 25.59% a tling bawk.

Mizorama swab sample endik bikah RT-PCR hmanga endik zat percentage chu ni tin a tlahniam hret hret zel a, Rapid Antigen Test (RAT) hmanga endik zat a pung hret hret thung. November 14, 2021 thlenga swab sample endik tawh 13,73,394 aṭanga RT-PCR hmanga endik zat percentage chu 23.24 a ni a, RAT hmanga endik zat chu 70.84% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,28,775 chu mi 1,000 zelah hripui vei mi 117 an awm ang a ni a; mi 1,00,000 zela Covid-19 vangin mi 42 an thi tawh ang a ni. Nimin khan tlai dar 5 thlengin hripui vei dam tawh mi 476 chhuahtir an ni a; Aizawl district-ah mi 318, Mamit district-ah 60, Lunglei district-ah 46, Champhai district-ah 26, Hnahthial district-ah 19 leh Khawzawl district-ah mi pasarih an chhuak.