Drugs awareness campaign neih a ni ; Ruihhlo vangin mi 1,688 an thi tawh

Nimin khan Aizawl Press Club-ah MJA member-te pualin Drugs Awareness Campaign buatsaih a ni a; Excise & Narcotics department (END) chhinchhiah danin, ruihhlo vangin Mizoramah mi 1,688 an thi tawh tih tarlan a ni.

Awareness campaign-ah hian resoursce person Peter Zohming­thanga, END assistant commi­ssioner chuan, Mizoramah ruihhloin pun lam a pan zel thu sawiin, "Covid-19 avanga inkhuah­khirhna kalpui a ni chungin a pung zel tho. Heroin kan man nasa hle a, puanzar zel phei chuan mipui rilru kan hruai sual ang tih hlauhawm khawp a ni," a ti.

Peter Zohmingthanga chuan, kumin kum tira Myanmar ram buaina avangin ruihhlo man tur thla hnih/thum vel a vàn thu sawiin, "May thla tàwp vel aṭangin kan man ta huk huk a, a mak kan ti zawk," a ti a; tunlaia Mizorama ruihhlo hluar ber chu heroin a nih thu a sawi.

END Assistant Commissioner chuan, Mizoramah chuan ruihhlo chu sorkar, tlawmngai pawl leh kohhranin theihtawp chhuahin a do tih sawiin," Mizoramah ruihhlo khawih a nihna a la rei loh tehreng nen, min khawih nasa tawh hle. Theihtawp chhuah mah ila, a pung tulh tulh emaw tih tur a ni. Tun hmain Aizawlah a hluar a, tunah chuan Aizawlah chauh lo pawh a hluar tawh. Ngaihthah chi a ni lo," a ti.

Peter Zohmingthanga sawi danin, kum 1984 aṭanga November 2021 thlengin ruihhlo vangin mi 1,688 an thi tawh a, mipa 1,491 leh hmeichhia 197 an ni. Tun hma deuh chuan proxyvon vanga thi an tam a, tunah erawh chuan heroin vanga thi an tam thung. Ruihhlo avanga thi zingah hian proxyvon ti ṭhin mi 1,161 leh heroin ti ṭhin mi 340 an awm.

Ministry of Social Justice and Empowerment leh The National Drug Dependence Treatment Centre (NDDTC), AIIMS, New Delhi zirchiannaa a lan dan chuan, Mizoram chu Punjab dawta India rama ruihhlo khawih nasatna ber state a ni.

Khehpuam chung­chang sawiin Peter Zohmingthanga chuan, "A tìrah khehpuam hi control substance zingah puan a nih loh avangin man theih a ni lo. Ruihhlo siamna atana hman a ni tih hriat a ni a, control substance-a puan a nih hnuah chuan an lo hausa vek tawh. Tlem azawng chauh kan man tawh zawk a ni," a ti.

Awareness campaign-ah hian MJA president Zonunsanga Khiangte kaihhruaiin sawihona leh zawhna leh chhanna hun hman a ni.