Nirmala hoin finance minister-te ṭhukhawm

Union Finance minister Nirmala Sitharaman hoin November 15, Thawhṭanni khan India rama state leh union territory hotute'n virtual meeting an nei a, Mizorama Finance enkawltu chief minister Zoramthanga a tel. Chief Minister hian ei leh bara hmasawnna nawr kal a pawimawh thu leh Mizorama hmalak theihna awmte a sawi.

Nirmala Sitharaman chuan, Covid-19 léng chu ram pum economy-in tuar mah se, sorkarin theihtawpa hma a lak avangin hripui léng thawh hnihna hnuah beisei phâk bakin tehfung hrang hrangah ramin hma a sawn tih a sawi a, "Hripui lên hmaa kan dinhmun ngai awh hialna pawh sector ṭhenkhatah a awm. He hmasawnna hi chhawm nung zel turin state tinte'n theihtawp in chhuah ve a pawimawh," a ti.

Union Finance Minister chuan, state leh UT sorkar hotute chu awlái zawka páwn lam mite'n investment an tih theih nan inhawng tur leh sorkar laipui pawhin economy hnârkaitu atan hmasawnna ruhrel din leh investment-ah ṭan a lak thu a sawi.

CM Zoramthanga chuan, sorkar laipuiin India hmarchhak state-te tana gross budgetary support 10% a pek tur a la pek chhuah loh chu a chanve tal pe chhuak turin a ngen a, "A chanve tal pek chhuah a nih chuan hmarchhak state-te'n hmasawnna hna kan thawhnaa puitu ṭha tak a ni ang," a ti.

Zoramthanga chuan, Mizoram bikah hmasawn hna thawh tur zinga langsar ber leh ṭangkai tak tur chu mau tihhmasawn (bamboo development) a nih thu sawiin, "Link road ṭha a awm loh avangin a chìnna hmun aṭanga factory thlen tur chuan hmun tam takah mau hralhna man aiin a phurhna man a to zawk a, a hlâwk thei lo a ni," a ti a, link road siam a pawimawh thu a sawi.

Chief Minister hi chief secretary Dr Renu Sharma, Finance secretary Vanlal Chhuanga leh Finance additional secretary Ramchuana ten an ṭawiawm a ni.