MSHCS-in health care an sawifiah ; ZLP-in an chhût dik loah an ngai

Mizoram State Health Care Society (MSHCS) hotute chuan nimin khan an pisaah thuthar thehdarhtute kâwmin, Mizoram State Health Care Scheme (MSHCS) chungchang an sawifiah a, "ZPM Legislature Party (ZLP)-te khan an chhût dik tâwk lo niin a lang," an ti.

MSHCS principal chief executive officer (CEO) Dr Chawngthanchhunga chuan, MSHCS chu MNF sorkar hmasain corpus fund atana cheng vbc. 50 dah hmanga an din a nih thu a sawi a, "A hnuah ADB aṭanga loan pûkin, corpus fund-ah cheng vbc. 117.4 dah belh a ni. Heng sum aṭanga a pungte chu Finance department-in quarterly-a pe chhuakin, kum khatah cheng vbc. 15/16 vel kan dawng ṭhin," a ti.

Dr Chawngthanchhunga chuan, MSHCS-ah inziak lut an tam zel avangin sumin a daih thei lo nia sawiin, "Tunah hian corpus fund-ah hian Chief Minister hmalaknain cheng vbc. 100 dah belh leh tum mek a ni," a ti a; corpus fund dah belh a nih hunah bill pek chhuah chak theih an inbeisei thu a sawi.

Kum 2019 aṭangin MSHCS chu central scheme ABPM-JAY nen kal kawpin, kum bithliah (fiscal year) October- Sep­tember chhung a nih ṭhin thu sawiin Dr Chawngthanchhunga chuan, "Kum khatah chhungkaw pakhatin Rs 2,00,000 thleng an bill thei a, inziah luh man pawh APL tan Rs. 1,000 leh BPL tan Rs. 100 a ni," a ti.

MSHCS Principal CEO sawi danin, MSHCS kum chhiar dan chu sorkar kum chhiar dan mil leh ABPM-JAY zûlzuia kalpui tum a nih avangin October 1, 2021 - March 31, 2022 (thla ruk chhung) atan kalpui lailâwk a ni a; thla ruk atan chhungkaw pakhatin an bill theih zat chu a chanve Rs 1,00,000 a tihhniam niin, inziah luh man pawh a chanve APL tan Rs 500 leh BPL tan Rs 50-ah tihhniam a ni.

Kum 2022 aṭang chuan MSHCS fiscal year chu financial year mila her rem a ni dawn. ZLP thuchhuahah, October 2021 - March 2022 thlenga Rs 1,00,000 hmuh theihna tura inziah luhna senso BPL tan Rs. 25 leh APL tan Rs. 250 tur ni àwm taka tarlan chu an chhût dik tawk loh vang nia a lan thu MSHCS hotute chuan an sawi.

MSHCS hotute chuan, MSHCS hnuaiah corpus fund cheng vbc. 200 chuang a awm thu sawiin, "Loan laka inremna angin a pung chauh a hman theih. Pawisa pung aṭang hian bill pekna tur a daih loh ṭhin avangin sorkar chuan sum ruahman a siam belh ṭhin. Covid-19 karah pawh bill a senior dan indawta pek chhuah zel a ni," an ti.

MSHCS hotute sawi danin, MSHCS bakah sorkar hnathawk MR bill leh ABPM-JAY an khawih tel a; sorkar hnathawk MR bill an tikhawtlai ngai lo a, a kaihhnawih department zawhfiah ngai an thawn a, chhànna dawn mai loh erawh a awm ṭhin a ni.