ACLCA-in rate an bithliah

Aizawl City Local Council Association (ACLCA) chuan nimin khan Dawrpui Multi­purpose Centre-ah Execu­tive Meeting vawi hnihna an nei a, Aizawl mayor Lalrinenga Sailo leh Aizawl DC Dr Lalhriatzuali Ralte ten an hmanpui.

ACLCA meeting hian LC-te'n signature an lo peka pawisa an lak ṭhin rate an siamṭha a; ILP atan Rs 500, advertisement/hoarding atan Rs 500 leh ram teh leh ennaah Rs 500 lak an rél a ni.

Lalrinenga Sailo chuan, local council chu phai lama municipal corporation-te pawhin an awt nia sawiin, "A zir chianna pawh an rawn nei hial a ni," a ti a; property tax dik taka mipuiin an pek chu mipui tan vêk a nih thu sawiin, ṭhahnemngai taka property tax pe turin mipui a ngen.