KHAWTHLIR

Thisen pe
KṬP, Ramhlun Vengchung Branch chuan nimin khan an din champha vawi 10-na pualin Synod Hospital tan thisen unit 26 an pe a, petute mipa 20 leh hmeichhia paruk an ni.

Mathematics zirho
Mizoram University leh University of Guadalaraja, Mexico chuan November 15, Thawhṭanni zan khan chawlhkar khat awh tur, 'International workshop-cum-conference on mathematics education an buatsaih a, MZU vice chancellor Prof. KRS Sambasiva Rao-a'n a hawng. Workshop-ah hian zan tin mithiamte'n thupui hrang hrang an sawi dawn a; a hawnnaah hian University of Guadalaraja rector Dr RP Munoz leh School Education secretary Dr Lalzirmawia Chhangte-te khualzahawm an ni.

BALA Anganwadi
Central Warehousing Corporation, Guwahati corporate social responsibility kaltlanga Lungleia ‘Building As Learning Aid' (BALA) Anganwadi Centre pahnih - Pukpui I & II centre-te chu nimin khan Lunglei DC Kulothungan A-in a hawng. BALA Anganwadi Centre hmalakna hnuaiah hian anganwadi centre thlanah naupang zirna kawnga puitu tur chi hrang hrang ruahman a ni.

Speaker Rinliana tel
Shimla, Himachal Pradesh-ah nimin khan prime minister Narendra Modi hoin 82nd All India Presiding Officers' Conference & 58th Conference of Secretaries of Legislative Bodies in India ṭan a ni a, Mizoram Assembly speaker Lalrinliana Sailo leh Mizoram sorkar hotute an tel. Conference hi naktukah zawh a ni ang.

Leiminin in hnâwl
Nimin zing dar 7:30 vel khan ruahsur nasa vanga leiminin Champhai Ruantlang Mualvenga Chuangkimi te in a hnâwl a, nimin vek khan senghawi hnatlang neih a ni. Hnatlangte ei leh in senso atan bialtu MLA TJ Lalnuntluanga chuan Rs. 5,000 a pe a, Champhai DC Office-a DMR Branch-in silpaulin pahnih leh Rs 1,000 an pe bawk.