Mizoram aia hripui vei hmuh thar tamna state pali a awm

November 15, Thawh­ṭanni khan Mizoramah Covid-19 vei mi 611 hmuh chhuah a ni a, India ramah Mizoram aia hripui vei hmuh thar tamna state pali a awm. Nimin khan hripui vei dam tawh mi 214 chhuahtir an ni a, Covid-19 vangin mi pahnih an thi.

Covid-19 vei hmuh thar 611-te chu mipa 282 leh hmeichhia 329 an ni a; ZMC laboratory-a hmuh chhuah 52, TrueNAT-PCR hmanga hmuh 46, RAT hmanga hmuh 511 leh Fluorescent Immunoassay (FIA) hmanga hmuh mi pahnih an ni.

IDSP record angin, Mizoramah Covid-19 vei 1,29,386 hmuh chhuah a ni tawh a, mipa 62,693 leh hmeichhia 66,693 an ni a, mipa aiin hmeichhia 4,000-in an tam zawk. Nimin tlai dar 5 thleng khan mi 1,23,952 (95.80%) chhuahtir an ni tawh a, mi 467 (0.36%) thi tawhin, enkawl mek mi 4,967 (3.84%) an awm.

November 15, Thawhṭannia Covid-19 vei hmuh chhuah mi 611 zinga mi 376 chu symtom nei an ni a, symptom nei lo mi 235 an ni. Thawhṭannia swab sample endik zawng zawng 5,411 aṭangin RT-PCR hmanga endik sample 448 chu 9.02% chiah a ni a; chutih laiin, Rapid Antigen Test hmanga endik 4,629 chu 85.55% a tling. TrueNAT hmanga endik 5.73% leh FIA hmanga endik 0.44% a ni bawk.

District hrang hranga swab sample endikah Covid-19 positivity rate 10% chung lam district paruk a awm a, positivity rate san berna Serchhip district-ah positivity rate 28.50% a ni. Positivity rate 10% chung lam district dangte chu - Champhai 21.46%, Lawngtlai 17.72%, Hnahthial 16.09%, Khawzawl 13.68% leh Aizawl 12.01% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 15, 2021 thlenga swab sample endik tawh 13,78,805 aṭanga RT-PCR hmanga endik zat percentage chu 23.19 a ni a, RAT hmanga endik zat chu 70.90% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,29,386 chu mi 1,000 zelah hripui vei mi 118 an awm ang a ni a; mi 1,00,000 zela Covid-19 vangin mi 42 an thi tawh ang a ni. Nimin khan tlai dar 5 thlengin hripui vei dam tawh mi 214 chhuahtir an ni a; Aizawl district-ah mi 94, Serchhip district-ah 33, Lunglei district-ah 24, Champhai leh Lawngtlai district-ah 23 ve ve, Kolasib district-ah pasarih, Khawzawl district-ah paruk leh Mamit district-ah mi pali an chhuak.