Champhai DC-in Champhai leileta Harsatna thlengte a enfiah
Champhai DC Maria CT Zuali leh sorkar official dangte chuan nimin khan Champhai leilet phaizawla tuilian vanga harsatna thlenna hmunte a tlawh a, State Disaster Response Fund (SDRF) kaltlangin sorkar dan ding lai anga ṭanpuina pek tum a nih thu a sawi.
November 12, Zirtawpni zan aṭanga ruahsûr avangin Khawchhak Tuipui lianin Champhai leilet phaizawl a chîm a, lei nâwi leh hnawmhnawk eng emaw zat a lên lut a; leileta buh chíngtu leh sangha khawitu eng emaw zatin harsatna an tawk a ni.
Champhai Bawrhsap chuan, tuilianin leilet a chîm avanga buh chíngtute leh sangha khawitute'n harsatna an tâwk chu a tawrhpui thu sawiin, "Tuilian avanga Champhai leilet phaizawla buh leh sangha khawi chántute chu SDRF kaltlangin sorkar dan dinglai anga ṭanpuina pek tum an ni. An chànna zawng zawngte tuamhlâwm séng vek dawn lo mahse sorkarin theihtawp a chhuah a, dan tlawhchhan ang zelin chhawmdawlna pek chhuah tum a ni," a ti.
Bawrhsap hian harsatna tâwktute chu an awmna páwl leh zau hrang hrang ang zela report kimchang siam tur leh department katlangin a rang lama DC pisaa thehlut turin a hriattir a ni.
Mihring siam chawp, leilet phaizawl hnár leh a chhehvela sumdawnna kudam sak leh lirthei dahna siamte chuan harsatna eng emaw chen a thlen thu sawiin Maria CT Zuali chuan, "Buh chìnna phaizawl thil danga hman chu dan kalh tlat a ni. Thil danga hman tum vanga leilet hmun chhilha lei chhûn pâwn leh leivûng paihna tur ni loa paihin Tuipui kuang a hnawh a, tun hma zawng aia nasain lui kuang páwnah tui a luan chhuah tam phah a ni," a ti.
Champhai DC chuan, dan loa leilet phai leh a chhehvela hmalaknain harsatna a thlen tuar hmasa leh nasa berte chu leilet phaia buh leh thlai chíngtute leh sangha khawitute an nih thu sawiin, hun lo la kal turah harsatna nasa zawk an tawh loh nan khawtlang anga ṭangrual thiam a ngaih thute a sawi. Leilet phai venhim leh humhalh kawngah theihtawp chhuaha lungrual taka thawhpuiah phaia loneitute leh district mipui a sawm a ni.
Bawrhsap hian Ruantlang Mualvenga ruahsur nasa vanga leiminin nimin zing dar 7:30 vela Chuangkimi te in a hnâwl tluk chu a tlawh nghal a, sorkar aṭanga ṭanpuina awm thei ang ang pek an nih tur thu a hrilh.