PM-in NITI Aayog meeting Pathianni-ah A koh avangin ka kal dawn lo - CM Hawla

New Secretariat Com­plex-a Commisio­na­rate of State Taxes building chu nimin khawn hawn a ni a; building hawngtu chief minister Lal Thanhawla chuan, NITI Aayog meeting chu Pathiannia koh a nih avangin a tel dawn loh thu a sawi.

Chief Minister chuan, NITI Aayog meeting chu Prime Minister-in June 16, Inrinnia neih turin a koh thu sawiin, "Tunlai ruahsûr nasa vanga Mizoramin har­sat­na a tawh nasat lai a nih avangin ka tel dawn leh dawn loh ka inngaihtuah mek laiin, June 17 (Pathianni)-ah meeting hi an rawn sawn a, chuvangin, ka tel dawn lo chiang sa," a ti.

Lal Thanhawla chuan, Taxation department-in khua leh tui an nihna anga chhiah pe ṭha duh lo zawn chhuah kawngah theihtawp an chhuah tih sawiin, "Mizote hi chhiah pe tlem pawl kan ni. Income tax kan âwl a, hmun dangah chuan an pe tam ṭhin," a ti a; chhiah pek tur ang ang khawn khawm kawngah Taxation hmalakna avangin chhiah lut a pun thu a sawi.

Sorkar hnathawkte'n chhiah an pek ṭhin pro­fessional tax chung­changah CM Hawla chuan, "Sorkar hnathawk hniam ber aṭanga a lian ber thlenga an pek zat inang chungchangah sawisel an awm ṭhin. Finance Commission hnenah pawh ka thlen tawh a, mahse, Parliament dan tihdanglam ngaihna thil a nih avangin a harsa hle," a ti.

Chief Minister chuan, ram inrelbawlna atan Taxation department an pawimawh thu sawiin, "Hun rei tak chhung mahnia building nei mumal loin an awm a, tunah chuan building ṭha tak an nei ta a ni," a ti a; Taxation-a thawkte chu ṭhahnemngai lehzuala hna an thawh a beisei thu a sawi.

Taxation minister Lalsawta chuan, "Kan department hi mi lawm zawng ti vak lo, a khawna khawn chi kan ni. Mahse, sorkara kan sum chhun luh a tam poh leh mipui tan kan thawk hlawk tihna a ni mai," a ti.

Commisionarate of State Taxes building hi cheng nuai 916.48 sênga sak a ni a, phase-I leh II ah ṭhen niin, phase -II chu March 27, 2013-ah sak ṭan a ni a, September 16, 2016-ah sak zawh a ni. Phase-II chu November 5, 2016-ah sak ṭan niin, March 16, 2018-ah sak zawh a ni thung a, chhawng sarih a ni.