KHAWTHLIR

YMA Day
Vawiin hi YMA vawi 84-na a ni a, Mizoram hmun hrang hrangah branch hrang hrangin an remchan dan ang angin an lawm dawn. Central YMA hruaitute chuan YMA Day hi hmun hrang hrangah an hmanpui dawn a ni.

Thisen pe
World Blood Donor Day pualin nimin khan GM Higher Secondary School NSS chuan Champhai District Hospital tan thisen unit 70 an pe a, a petute mipa 43 leh hmeichhia 27 an ni. Lunglei CIvil Hospital-ah pawh blood donation camp huaihawt a ni a, mipa 26 leh hmeichhia 19-te'n thisen unit 45 an pe a ni.

Sorkar ngen
Mizoram Govt. Adhoc Auded Higher Secondary School Leturers' Association (MIGAAHSSLA) chuan thuchhuah siamin, adhoc aided higher secondary school 13 zinga pakhat, C Zakhuma HSS, Kolasib chu Mizoram sorkarin a la (provincialise) chu an lawmthu thu an tarlang a, "Mizorama adhoc HSS dang 12-te pawh MLA inthlanpui hma ngeia provincialise turin kan ngen a ni," an ti.

Duhsakna hlân
MNF party chuan thuchhuah siamin, vawiin YMA Day chu hlim leh nuam ti taka hmang turin YMA branch tinte leh mipui duhsakna an hlan a, "Ram leh hnam humhalha Mizote zahawm leh hmingṭhaa min siamtu YMA hi MNF chuan chhuanawm kan ti a; mi chanhai, hnuaihnung leh retheite ṭanpuia chhawmdawltu, chhiat/ṭhata mi lian leh tê thliar loa ang khata min entu chu YMA hi a ni," an ti.

Kum 5 inkhawm
Kelkanga kohhrante chuan khaihlak awm loa zan tin an inkhawm kum nga a tlinna chu June 13, Nilaini khan ruai nen an lawm. Kum nga chhung chatlak awm loa zan tin an inkhawm champha lawmna hun hi June 11-ah an hmang ṭan a, June 12-ah bethel hun hmangin, Nilaini zan khan Pathian biak inkhawma hun an hmang a, nimin khan ruai nen hun an hmang leh bawk. Kelkang kohhran hian June 12, 2012 zan aṭangin zan tin an la inkhawm ziah a ni.