Serchhipah NH-54 kawngpui a min nasa Tuilian leh leikhi vanga inthiar chhuak an tam

Serchhip dái, Sailiam kâwn piaha lei min chu nimin zing dar 9 vel khan nasa takin a min belh a, NH-54 kawngpui pawh a min bal vek avangin NH-54 kawngpui hmangin Serchhip aṭanga chhim lam lirtheia kal pawh theih a ni lo. Hetih lai hian, Mizoram chhimthlang lamah tuilian vangin mi eng emaw zat hmun him lamah an inthiar chhuak.

Serchhip leimin
Sorkar thuchhuah tarlan danin, Serchhip Sailiam kâwn akanga Keiṭum lam panna NH-54 kawngpui chu metre 100 vela thui leh a chhehvel mual zawng zawng deuh thaw a min a, "NH-54 kawng chhuat thui tak a tawlhpui vek avangin hun eng emaw chen chu lirthei eng chi mah a kal theih dawn rih loh niin a lang," a ti.

Kawngpui bal hi kawng chhak lam ko aṭanga inṭanin, kawng pumpui huapin a mualin a bal a, Hnahthial kawlphetha pekna banpui pawh a minpui a, a chhak lam meter 20 velah Zoram chhim lam êng pekna hruipui 132 KV line thlunna banpui pawh a awm a, a min zui zel chuan a minpui ve hlauhthawnawmin a awm.

Zawhna chhanga PWD Highway hotute sawi danin, NH-54 kawngpui motor kal theiha siam leh tur chuan kawng chhak lam ko sang tak, metre 60 vela sang laih a ngai dawn a, chu chu mimal ram a nih avangin Serchhip DC nen ṭang tlanga ram neitute dawr a ngai dawn a ni.

Serchhipah hian BCM biak-in hnung lam mual pawh a tawlh reng avangin biak-in thlang lama NH-54 kama chengte tan a him lo theia hriat a nih avangin UPC (Mizoram) pastor quarters leh a ṭhenawma Saitluanga te bungrua te, mual zâwna awm Rimawia te bungruate thiar chhuah a ni. Lei che hian NH-54 kawngpui a hnawh pin zel avangin Serchhip District Disaster Management Authority chuan a hmunah JCB a dah a, lei tla apiang a hai nghal zel a ni.

Nimin chawhnu khan Serchhip DDMA chairman Sangchhin Chinzah, DC chuan Serchhipa V/C hruaitute a pisaah kâwmin, chhiatna hrang hrang thleng vanga harsatna awm theite sutkian dan tur a sawipui.

Sangchhin Chinzah chuan, Sailian kâwn piaha NH-54 kawngpui min vangin Serchhip khawpui bawlhhlawh paihna kawng a ping a, bawlhhlawhte chu Chhiahtlang khaw bawlhhlawh paihnaah paih rih a nih tur thu a sawi.

Khawthlang lama harsatna
Thu dawn danin, Khawthlangtuipui lian vangin Tlabungah mi 600 vel an awmna aṭanga lak chhuah an ni a, Zawlpuiah chhung­kaw 20, Bolia-ah chhungkaw 20 vel, Bunghmunah chhungkaw 30 an inthiar chhuak tawh a; Marpara-ah chhungkaw 60 vel thiar chhuah an ni bawk. Terabonia leh Sumasumi chu a khaw pumin tuilianin a chîm a, Tuikawi lamah an inthiar chhuak a ni.

Bunghmun khaw chhungah lei a tlak­hniam vangin kawngpui a khi chat nasa hle a, a khîk zauh zel avangin a bul hnaia mite an inthiar chhuak a, chhungkaw 30 bakah, biak-in leh sikul bungruate an thiar chhuak tawh ni. Chhimthlang lama tuilian leh leimin vang­a chhiatna thlenna hmunte hi bialtu MLA Zodintluanga, minister chuan a tlawh ang.

Minister Zodintluanga hian nimin khan Lunglei Circuit House-ah Lunglei DC leh sorkar department zawng zawng hotute hmalak dan tur a sawipui a, Lunglei West bialtu MLA Chalrosanga Ralte pawh a tel. Lunglei leh a piah lamah bungraw mamawh phur motor lian kal pawh theih a nih rih loh avangin Haulawng leh Dâwn inkar kawng chu rang zawka thawm ṭhat thuai ni se, an ti.

Meeting chuan, Lunglei district-ah tui lian leh lei min leh khi a tam avangin chhawm­dawlna awm thei ang ang pek nghal turin an rel bawk.

Zodintluanga chuan, fûr ruahsur leh thli tleh vanga Mizoram hmun hrang hrangah chhiatna a thleng mek chu pawi a tih thu sawiin, "Ṭanpui ngaite leh chhanchhuah ngaite pui turin sorkarin nasa takin hma a la mek zel a ni," a ti a; Khawthlangtuipui lian vanga chhungkaw 700 velin an chenna in an chhuahsan hial a ngaih chungchangah, chhiat tâwk chhungkuate a tawrhpui tak zet thu a sawi.

Minister chuan, khuarel chhiatna thlengin a nghawng theih mihring hriselna tichhe thei hrileng a awm loh nan Health department hotute chu ṭan la turin a chah bawk.

Bairabia tui lian vangin harsatna a thleng
Nimin tlai thleng khan tui lian avangin Bairabia chhungkaw 100 velin chenna in an chhuahsan tawh. Bairabi khaw luh dawna lei chu motor a kan theih a ni loa lawnglenga kai ngaiin, Zophai hmun pawh tui in a chim a, lawngleng a inkal pawh a ngai. Meidum khuaah mihring chenna in enge maw zat chu tuilian hian a chim bawk a ni.

Tuilian avanga harsatna tawkte chu hmun remchangah sawn chhuah an ni a, District Administration hmalakna hnuaiah Sub Hqrs, Joint leh Branch YMA te puihbawm na in an ei leh in tur buatsaih a ni a, tun dinhmunah harsatna liantham tawk an la awm lo nia thudawn a ni.