MRHG DG post-a buaina awm pawi ti

Mizoram Departmental Officers Association (MDOA) chuan thu­chhuah siam­in, Mizoram Home Guards (MRHG)-a Director General (DG) post siam chungchanga buaina awm mek chu pawi an tih thu an tarlang a, "Buaina a awm tawh loh nan sorkarin hma la se kan ti hle a ni," an ti.

MDOA chuan, departmental officer-te thlen san theih ber head of department chu director/joint secretary/selection grade rank a nih thu sawiin, "Hemi bak hi chu tun dinhmunah beisei tur kan nei lo a, Mizoram Home Guards & Civil Defence-a Commandant General - cum - Addl. Director ni chunga DG post siam a nih chuan chu head of department chanvo chu chhuhsak a ni dawn tihna a ni," an ti a; Mizoram sorkar hnuaia thawkte lungrual taka kan thawhho theih nan sorkarin duhsak bik leh thlei bik nei lo se an duh thu an tarlang.

Ministry of Home Affairs (MHA)-in Mizorama Civil Defence din tur a tihnaah, kalhmang pangngai awm sa leh state danga tih ṭhin danin, MRHG nen chhun fin a ni mai chauh tih ans awi a, "A enkawl tur hian DG post siam tur tih a awm hran lo. Compendium of Instructions, 2011-ah pawh state headquarters-a HGCD enkawl tur chu tuna post awm sa Commandant General - cum - Director, Civil Defence niin a ziak a ni," an ti.

Mizoram Police Service (MPS)-te bik hamṭhatna tura Home Guards & Civil Defence department-a DG post siamsak chu ṭha lo an tih thu sawiin MDOA chuan, "Sorkara thil ti thei zawkte'n hetianga mahni department aia lian lo zawk an páwng nêk mai ṭhin hi pawi kan ti tak zet a ni," an ti a; tun hnuah thleng tawh lo se an duh thu an sawi bawk.