Sorkar nawr kal chawp a ngai lo - MPCC

Congress party chuan nimin khan thuchhuah siamin, Congress party kaihhruai Mizoram sor­kar chu nawr kal chawp a ngai lo niin an tarlang.

MPCC chuan, The Citizenship (Amendment) Bill, 2016 chung­changah Mizoram sorkar chu hmalakna nei lo anga puhna thawm a awm tih sawiin, chu chu an chhang a, "Tun hnai khan Central-a BJP kaihhruai NDA sorkarin The Citizenship Act, 1955 siamṭhat tumna, The Citizenship (Amendment) Bill, 2016 chungchangah ngaihṭhat lohna a awm avang­in all party leh all NGO meeting neih a ni," an ti.

MPCC tarlan danin, Citizenship (Amendment) Bill, 2016 chu Mizoram tan thil ṭha nia a hriat loh vangin chief minister Lal Thanhawla'n July 31, 2017-ah Union Law minister Ravi Shankar Prasad hnenah lehkha a thawn a, Bill chu India hmarchhak state-te tan fimkhur a ṭul a, Mizoram tan Bangladesh aṭanga Chakma Buddhist sakhaw biate Mizorama an rawn luh ṭhin avangin fimkhur a ngai zual tih a tarlang. Bill chungchangah Mizoram sorkar leh Mizorama political party hrang hrang, mimal leh NGO-te ngaihdan lak a rawt tawh a ni.

CM Lal Thanhawla hian Joint Committee on The Citizenship (Amendment ) Bill, 2016 chairman Dr Satyapal Singh, MP hnenah pawh August 11, 2017-ah Union Law Minister hnena lehkha a thawn ang deuh tho a thawh leh bawk.

Chief Minister hmalakna hre si loa ram hruai ve tumte’n Congress sorkar an duh ang zawng zawnga demna ṭawngka an chhâk chhuak chu ti tawh lo turin MPCC chuan chuan an duh thu an sawi a, "Ṭum nga sorkarna chelh tawh Pu Lal Thanhawla kaihhruai Congress tluka ram leh a mipuite hmangaih an awm lo," an ti.

MPCC chuan, ZPM Chairman-in Mizoram sorkara hruaitute Pa­thian leh kohhran thu ngai pawimawh loah a puh nia sawiin, "Thil hre chiang loa kan ram hruai tumtute’n thu a chhâk chhuak ṭhin hi MPCC chuan pawi a ti hle a ni," an ti bawk.