YMA Day hlim taka lawm a ni

YMA Day vawi 84-na chu nimin khan Mizoram pumah leh Mizoram páwn hmun ṭhenkhatah hlim taka lawm a ni a; khawtlang tana thil ṭha tihna ni, mite ṭanpuina ni, intihhlimna hun leh infuih tharna hun atante hman a ni. Central YMA president Vanlalruata chuan, YMA-in nasa zawkin ruihhlo an do zel dawn tih a sawi.

YMA Day hi branch tam zawk chuan zing karah leh chhun lamah an khua/veng tihfaina ní-ah an hmang a, intihhlimna leh intihsiakna hun atana hmang eng emaw zat an awm. Branch ṭhenkhat chuan YMA Day pualin mi harsate an ṭanpui a, damdawi-inah ei leh in tur sete pawh an awm a ni.

Branch eng emaw zatin nizan khan YMA Day an lawm chhunzawm a, intihhlimna leh zaipawl leh thil danga intihsiakte an awm bawk.

Central YMA president Vanlal­ruata chuan nimin khan Venghlui Branch YMA-in an branch kum 60-na, diamond jubilee leh YMA Day an lawmna a hmanpuinaah thu sawiin, "Kum 2004 aṭang khan YMA chuan ruihhlo kan do a, khan hun lai khan ruihhlo vanga thi an tam hle a, a hnuah kan ziaawm chhoh viau laiin, tun hnai aṭangin ruihhlo a hluarin thihpui an tam leh ta. Chuvangin, nasa zawkin ruihhlo kan do leh dawn a ni," a ti.

Vanlalruata chuan, YMA thupui chu ram leh hnam humhalh a nih angin, khawtlang a lo nawm zawk nan YMA tihchak a ngaih thu a sawi a, "Mizote kan tlem a, chuvangin, hnam dang lakah harsatna kan tâwk tial tial a, chuvangin inthlahpui tam a ngai a ni," a ti a; ṭhenawm khawvengte nen inpawh thar leh tum turin YMA member-te a chah.

Hnam dang lakah thîkthu tihchhiat a ngai nia sawiin CYMA President chuan, "In leh dawr luah chungchangah, mahni hnampui ngei luahtir a pawimawh a, hnam dang, kan in leh lo luahtute hian kohhranah engmah an thawh lo a, khawtlangah pawisa pakhatmah an sêng ve lo. A ṭangkai ber kan Mizopuite ngei hi in leh lo luahtir turin ka ngen a ni," a ti.

Venghlui Branch YMA hian an diamond jubilee hi chi hrang hrangin an lawm a, nimin tlai khan a lawmna ruai an ṭheh a ni.

CYMA general secre­tary Lalhmachhuana pawhin Aibawk Branch YMA-in Day an lawmna a hmanpuinaah thu sawiin, YMA chu pawl thianghlim, politics tui nûin a chîm buai theih loh a nih thu a sawi a, "Politics-a colour nei pawhin YMA-ah a colour a ken luh a thiang lo. YMA hi nghet taka ding reng thei tur chuan a laimu, ṭanpui ngaite ṭanpui tih hi kan hlamchhiah a thiang lo," a ti.

Mizoram 3rd. IR ba­tta­lion-te pawhin an awmna, Barpathar, Assam-ah YMA Day an lawm a, infiamna leh intih­hlimna chi hrang hrang neiin hun an hmang a ni.

Kum 2017 YMA General Con­ference report-a a lan danin, Central YMA hnuaiah YMA branch 805, group 47 leh sub-headquarters panga a awm a; YMA member 4,04,722 awmin, mipa 2,47,467 leh hmeichhia 1,57,255 an ni.

Mizoram páwnah - Assam, Meghalaya, Manipur, Tripura leh Nagaland-ahte YMA group leh branch a awm a, ram páwn Bangladesh-ah Sajek branch a awm bawk.