Ramri zirchiang turte'n ramri an la tlawh lo

May 21, 2018-a chief minister Lal Thanhawla hoa Cabinet Room-a ṭhukhawmte'n 1933 Map zirchiang tura a din Core Committee chuan ramri an la tlawh lo.

Chief Minister hoa May 21-a meeting-ah hian Home Minister, Home Secretary, PCCF leh Assam leh Mizoramin ramri an endik ho ṭuma Mizoram Team member-te an tel a ni.

Meeting chuan, ramri chungchang zir chiang turin Home addi­­tional secretary Lalbiak­zama kaihhruai Core Committee an din a; Committee-ah hian sorkar official-te bakah, MZP aiawhte member an ni. Committee hian Mizorama tlawmngai pawlte'n Mizoram china an ngaih 1933 map-ah ramri chhinchhiahna a chiang tâwk loah a ngaih avangin, a zir chiang turin Core Committee a din a ni.

Core Committee hian 1983 map-a ramri awmte chu a hmunah kalin an zir chiang dawn a, July 2018 ral hmaa report thehlut hman tura tih an ni. An report aṭangin Mizoram sorkarin a ṭul angin hma a la chhunzawm ang.

Vanglaini thu dawn danin, Core Committee hi ṭum khat an ṭhukhawm tawh a, member an inruat belh a, member tharte nen an la ṭhukhawm lo. Core Committee-ah hian a tirah chuan Home Additional Sec­retary bakah, Conser­vator of Forests leh MZP Pre­sident an ni a, Revenue Drector leh Delhi Mi­zoram House ARC te mem­ber-ah ruat belh an ni.

Core Committee hian 1933 map-a ramri awmte chu a hmunah kala zir chiang tura tih ni mah se, nimin thleng kha chuan ramriah an la kal lo a ni.