Pawl zingah KṬP-in thisen an pe tam ber
Kum 2017-18 chhung khan Mizoram hmun hrang hranga pawl hminga thisen pe zingah Kristian Ṭhalai pawl (KṬP)-in an thawh hlâwk ber a, KṬP member-te'n pastor bial leh branch hminga thisen an pek belhkhawm chu unit 3,636 a ni.
June 14-a Aizawla World Blood Donor Day hmannaa Association for Voluntary Blood Donation (AVBD) general secretary Lalrinkima report-a a lan danin, April 2017 - March 2018 chhunga thisen pe pawl zinga a pe tam ber KṬP hian donation camp ṭum 112 an nei a, chutah chuan thisen unit 3,636 an pe a ni.
National Service Scheme (NSS) unit hrang hrangte'n an pek zat chu unit 3,110 a ni a, hetiang zat pe tur hian donation xamp ṭum 34 huaihawt a ni. NSS unit (college/institution) zinga kum khat chhunga donation camp ṭum khat aia tam huaihawt eng emaw zat an awm.
Ṭhalai Kristian Pawl (ṬKP)-in thisen unit 1,856 an pe a, hetiang zat pe tur hian ṬKP unit, bial leh coordination-te'n donation camp ṭum 48 an buatsaih. Kohhran ṭhalai pawl dang zingah Salvation Army Youth (SAY)-in donation camp ṭum 14-ah thisen unit 540 an pe a; Adventist Youth-in camp 10-ah unit 244, LIKBK Ṭhalai Pawlin camp vawi rukah unit 184, IKK Ṭhalai pawlin camp vawi hnihah unit 127, Pentecostal Youth Department (NEI)-in camp vawi 4-ah unit 92, Catholic ṭhalaiin camp vawi khatah unit 63 an pe bawk.
YMA hminga pek zat chu unit 1,543 a ni a, hei hi joint YMA leh branch hrang hrangin donation camp 38 an huaihawta an pek zat belhkhawm a ni. Sports & Youth Services department chuan donation camp ṭum 11 huaihawtah thisen unit 757 an pe a, Mizoram police-te'n camp vawi li-ah unit 220 pein, Congress party ṭhalaite'n camp vawi hnihah unit 141 an pe. Mizoram sorkara Secretariat pawhin ni hnih chhung donation camp an neihah thisen unit 80 an pe bawk a ni.
Kum 2017-18 chhunga pawl hminga thisen pek zawng zawng zat belhkhawm chu unit 15,601 a ni a; chutah chuan kohhran ṭhalai pawlte'n an pek zat chu unit 6,259 niin, zirna-inte'n an pek zat unit 4,109, YMA-te'n an pek zat unit 1,543 leh pawl dangte'n an pek zat unit 3,654 a ni.