Minister-in a biala harsatna thleng a enfiah

Minister Zodintluanga chuan nimin khan a bial, Thorang huam chhunga tuilian leh lei min leh khi vanga harsatna thlenna hmunte a tlawh a; a remchan angin ṭanpuina a pe.

Zodintluanga hian nimin khan tuilian vanga harsatna tâwk Zawlpui leh Bolia te a tlawh a, chawhnu lamah lei khi vanga khaw chhung chanve velin harsatna an tawh mekna Bunghmun khua a tlawh leh bawk.

Zawlpui khua hi tun hnaia ruahsûr vanga tuilian­in a khaw pum deuh thaw a chîm a, in 20 chuanga chengte an inthiar chhuak a, tui a kâm leh tawh avangin an chenna inah an let leh tawh hlawm. Minister hian an harsatna tawhte a hmunah enin, an mamawh zualpui phuhrûk nan ṭanpuina a pe nghal.

Bolia khua pawh an khaw zatve vel tuilianin a chîm a, tun dinhmunah tuilian a ziaawm deuh tawh. Zodintluanga chuan an mamawh zualpui a pe a, tuilianin a tihchhiatte uluk taka thla laa Lunglei DC hnena thehlut turin a hrilh a ni.

Zodintluanga chuan, a bial chhung mipuite'n an khaw kawng min vanga inkalpawhnaa harsatna an tawh chu chinngfel turin chak taka hmalak a nih thu a sawi a, "Nikum tuilian ai khan Khaw­thlangtuipui hi kumina a lian nasa zual a, kumin hi a len ber ṭum a ni. Lui dunga cheng khuate'n an tuar nasa em em a ni," a ti.